“Ha’u mak ba halo negósiasaun agora, no fila mai la lori la lori kadoras mai Timor – Leste, oras ne’e lahatene kala tara ona ha’u, tanba Xanana mak ba halo negósiasaun la lori kadoras mai, nia sei nafatin iha leten,” hatete Alkatiri liu hosi nia diskursu ida iha Lospalos foin lalais.

“Ha’u iha rai ida ne’e, ha’u ko’alia. Ha’u la tauk. Ha’u ko’alia, maibé ha’u la iha odiu ba ema ida. Ha’u sei la halo vingansa ba ema ida. Maibé, saida mak loos, loos, saida mak sala, sala,” esplika Alkatiri.

Alkatiri halo komparasaun entre nia ho Xanana katak, durante tinan 24 nia hela iha liur, maibé bainhira fila mai Timor – Leste nia sei hatene hela dalan ba nia rai ka uma moris fatin iha Lorumatan, maibé Alkatiri hatete ba Xanana katak foin mak ba halo negósiasaun durante fulan hitu de’it iha rai liur, no depois fila mai Timor – Leste lahatene ona dalan atu ba palásiu governu.

“Agora dehan la koñese palásiu iha ne’ebé, foin fulan hitu de’it iha liur buka dalan ba palásiu mós la hetan ona. Halo ita vontade atu ko’alia hanesan ne’e. Ha’u uluk tinan 24 fila – fali mai, ha’u buka ba – buka mai sei hetan uma uluk be ha’u moris iha Lorumata ne’e sei iha ne’eba hela. Ha’u hetan duni, tinan 24,” kompara Alkatiri.

 “Agora fulan hitu de’it, palásiu be uluk hela iha ne’eba, tur iha ne’eba, serbisu hela agora buka dalan la hetan ona”.

Alkatiri promete katak, hahu loron 2 Abril, nia tilun sei diuk ba provokasaun, sei la hatan ba ema ida, no sei tun ba povu aprezenta de’it programa.

 “Ha’u sei tun ba povu atu kombate de’it status quo, ha’u sei tun ba povu atu kore (hasai) povu hosi mukit, atu kore povu hosi ki’ak”.

Prezidente Aliansa Mudansa ba Progresu (AMP), Kay Rala Xanana Gusmão “la rekoñese” governu atual ne’ebé lidera hosi Primeiru – Ministru Mari Alkatiri.­

 “Ha’u mai to’o Dili labarik sira ha’u atu esplika governu jestasaun (jestaun), ha’u mós lahatene ida. Sira dehan avo Nana ami lahatene saida mak governu jestaun,” hatete Xanana iha sede AMP, Bari Grilos – Dili, Sesta, (16/03).

Xanana hatutan, to’o oras ne’e mós nia lahatene governu ne’e iha ne’ebé.

“Ha’u ba halo peregrinasaun fulan ne’en nia laran ne’ebé ha’u la hatene governo ne’e iha ne’ebé,” hatete Xanana.

Eis primeiru – ministru, Kay Rala Xanana Gusmão hatete, maske hala’o hela peregrinasaun iha rai liur durante fulan, maibé nia simu informasaun katak durante fulan ne’en nia laran, governu insulta hela de’it nia nu’udar koruptor.

“Se ita hare katak fulan hirak ne’e governu la konsege halo nia serbisu, la’o ba – la’o mai halo fali kampaña. Ha’u rona, ha’u fulan 6 iha liur, ha’u lahatene. Ha’u rona katak la’o ba – la’o mai insulta Xanana mak koruptor, ida ne’e governu saida mak ida ne’e,” hatete Xanana bainhira hasoru malu ho grupu joventude no arte marsiais sira iha salaun katedral Dili, Sabádu (24 /03). (Oki)