Login to your account

Username *
Password *
Remember Me

Grupu Deskoñesidu Asalta Segundu Vise Sekjer CNRT Featured

Kareta ne'ebé hetan tuda iha Letefoho, Ermera, Sesta (06/04). Foto supplied. 

 DILI – Seidauk tama ba iha periodu kampaña eleitoral ba eleisaun antisipada, maibé tensaun politika iha baze komesa manas ba dadauk. 

Lider partidu politika sira ko’alia bebeik no husu bebeik ba povu tomak atu labele kria ka halo instabilidade iha rai laran, liliu iha periodu konsolidasaun partidaria ba to’o periodu kampaña no eleisaun nian, maibé liafuan hirak ne’e folin la’ek de’it, tanba la’ós tentasaun de’it, maibé mosu duni asaun anarkizmu no krime hasoru lider partidu politika sira bainhira ba hala’o konsolidasaun iha baze.

Ijemplu konkretu mak antes ne’e mosu grupu ida taka dalan ba konvoiu portavoz Alliansa Mudansa ba Progresu (AMP) atual prezidente Partidu Libertasaun Popular (PLP), Taur Matan Ruak (TMR) iha Vikeke, no iha loron Sesta dader, 6 Abril 2018, mosu tan grupu balun halo asaltu ba konvoiu TMR nian ne’ebé tuda kareta Segundu Vise sekretariu jeral partidu CNRT nian, Jacinto Rigoberto iha postu administrativu Letefoho, munisipiu Ermera.

Tuir informasaun ne’ebé Tempo Timor asesu katak, ekipa AMP nian kompostu hosi TMR no Jacinto Rigoberto mai hosi diresaun postu administrativu Atsabe atu ba halo konsolidasaun partidu nian iha postu administrativu Hatulia, maibé derepente hetan asaltu hosi grupu deskoñesidu iha dalan klaran, iha postu administrativu Letefoho.

Segundu Vise sekretariu jeral partidu CNRT, Jacinto Rigoberto hatete, nia saudavel hela, maibé nia kareta mak a’at.

“Tarjetu ne'e ba ha'u duni. Vidru kareta oin boot ne’e mak rahun, tanba fatuk boot tolu mak mai loos. Sorte tau reben be la borus,” hatete Rigoberto via kontaktu telemovel ba Tempo Timor, Sesta (06/04).

“Ohin ha’u relata kedas iha polisia eskuadra Letefoho, hasai evidensia buat sira ne’e hotu ne’ebé entrega ba sira. Polisia mós haruka nia ema ida mai akompaña ha’u mai to’o tiha Bulolo mak fila,” hatutan Rigoberto.

Rigoberto hatutan, asaltu ne’e akontese iha postu Letefoho, suku Haubu iha dalan atu ba Hatugau.

Entretantu, komandante eskuadra polisia postu administrativu Letefoho, Cornelio Moniz rekoñese katak, iha duni keixa mai partidu AMP nian kona – bá akontesementu ne’ebé akontese iha Letefoho, maibé komandante Moniz seidauk bele relata kronolojia klean, tanba sei relata relatóriu kompletu ba komandante polisia munisipiu Ermera mak foin bele sai klean.

“Iha keixa duni, maibé sei submete hela iha prosesu iha eskuadra Letefoho, Ermera,” hatete komandante Moniz via kontaktu telemovel ba Tempo Timor, Sesta (06/04).

“Loloos ne’e ha’u bele relata hela, maibé sei prepara hela relatóriu hodi relata ba komandante munisipiu, tanba ha’u nia elementu sira sei halo hela observasaun, identifikaasaun ba fatin krime, no iha hela prosesu laran”.

Rate this item
(1 Vote)
Last modified on Friday, 06 April 2018 22:28
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« December 2022 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  

Tempo Timor Networks

Online Counter