Tempotimor (Díli) – Komemorasaun tinan 20 Konsulta Populár nu'udar refleksaun ida ba povu Timor-Leste kona-ba dezafiu, terus, sofrimentu ne'ebé liuhosi funu naruk ida to'o referendu.

 

“Agora oinsá ita reflete akontesimentu hirak ne'ebé akontese iha tempu kotuk, para projeta ba oin, katak dezafiu ida uluk ne'e tenke sai motivasaun ba joven sira para hateke ba oin ho mehi ida, oinsá ita liberta ita-nia povu husi mukit no kiak," hatete Prezidente Parlamentu Nasionál (PPN), Arão Noe de Jesus Amaral remata misa agradesementu ba tinan 20 referendu iha Igreja Katedral, Díli, Kinta (29/08/19).

 

Nia sublina, povu Timor-Leste tomak tenke orgullu no halo reflesaun hodi hateke ba oin liuhosi loron Konsulta Populár ne'ebé iha loron 30 Agostu 2019, sei komemora ba dala ruanulu.

 

"Parabens ba povu Timor Leste no benvindu ba bainaka husi mundu ne'ebé maka prezensa hodi partisipa ita nia komemorasaun ne'e. Ha'u hein katak, husi partisipasaun sira ne'e hotu atu motiva Timoroan sira para hateke ba oin ho fiar," nia tenik.

 

PPN mós enkoraja Timoroan hotu katak, Timor-Leste nia festa tinan ruanulu Konsulta Populár lori direitu tomak ba povu Timor-Leste, to'o hetan nia soberania tasi nian totalmente.

 

"Ita tenke halo reflesaun ba ita nia tratadu Tasi Timor, ne'ebé iha Sesta 30/08/19 lokraik halo troka nota. Ne'e hatudu katak ita nia soberanu kompletu ona iha Tasi nian, nomos rai maran nian sei kompleta mós iha tempu tuir mai," nia dehan.