“ohin previlejiu no sente onradu hasoru Primeiru Ministru Xanana, no ami ko’alia kona-ba dezenvolvimentu iha nasaun ne’e, partikularmente kona-ba dezenvolvimentu rekursu umanu. Nu’udar fundadór ba organizasaun dezenvolvimentu rekursu umanu ASEAN, hanesan organizasaun privada ka sosiedade sivíl ami hakarak kria oportunidade dezenvolvimentu rekursu umanu iha kada membru ASEAN, partikularmente liga ho situasaun Timor-Leste”, informa Bob Aubrey, iha Pálasiu Governu, segunda (28/08/2023).
Bob ne’ebé akompaña husi Ministru Prezidénsia Konsellu Ministru, Agio Pereira no Sekretária Estadu ASEAN, Milena Rangel hafoin hala’o enkontru ho PM Xanana, rekomenda ba Timor-Leste presiza prepara-an didi’ak rekursu umanu aprende husi nasaun membru ASEAN sira, hodi bele prepara-an di’ak liután atu simu buat hotu- hotu ne’ebé Assosiasaun Rejionál Sudeste Aziatiku sei oferese ba Timor-Leste nomós oferese ba ASEAN.
Durante enkontru, PM Xanana husu mós ba Bob Aubrey atu fahe esperiénsia di’ak sira ba membru Governu tomak, liuhusi semináriu ne’ebé Governu Timor-Leste sei prepara iha tempu badak. (*)