Projetu Dekretu-Lei sira ne’ebé aprova kona-ba orgánika Ministériu Edukasaun, Ministériu Ensinu Superiór, Siénsia no Kultura, Ministériu Transportes no Komunikasaun, Ministériu Komérsiu no Indústria, Ministériu Dezenvolvimentu Rurál no Abitasaun Komunitária, Ministériu Interiór, Ministériu Juventude, Desportu, Arte no Kultura, Ministériu Planeamentu no Investimentu Estratéjiku, no Ministériu Finansas.

Projetu Dekretu-Lei, ne’ebé aprezenta husi Ministra Dulce de Jesus Soares, ne’ebé aprova Orgánika Ministériu Edukasaun nian. tanba Ministériu Edukasaun maka departamentu governamentál ne’ebé responsavel ba konsesaun, ezekusaun koordenasaun no avaliasaun ba polítika ne’ebé define no aprova ona husi Konsellu Ministrus, iha área ensinu no kualifikasaun ba nivel ensinu hothotu, la inklui nivel superior, no konsolida no promove lian ofisiál sira.

Nune’e mós Projetu Dekretu-Lei, ne’ebé aprezenta husi Ministru José Honório da Costa Pereira Jerónimo, ne’ebé aprova orgánika Ministériu Ensinu Superiór, Siénsia no Kultura nian. Tanba Ministériu Ensinu Superiór, Siénsia no Kultura maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika, define no aprova ona husi Konsellu Ministrus, ba área ensinu no kualifikasaun nível superiór nian, nune’e mós ba área siénsia no teknolojia nian.

Iha mós Projetu Dekretu-Lei, ne’ebé aprezenta husi Ministru Miguel Marques Gonçalves Manetelu, ne’ebé aprova orgánika Ministériu Transportes no Komunikasaun. Tanba Ministériu Transportes no Komunikasaun maka departamentu governamentál ne’ebé responsavel ba konsesaun, ezekusaun no koordenasaun no avalisaun ba polítika ne’ebé define no aprova ona husi Konsellu Ministrus ba área transportes no Komunikasaun.

Ba Projetu Dekretu-Lei, ne’ebé aprezenta husi Ministru Filipus nino Pereira, ne’ebé aprova orgánika Ministériu Komérsiu no Indústria nian. Tanba Ministériu Komérsiu no Indústria maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika sira ne’ebé define ona husi Konsellu Ministrus ba área atividade ekonómika, komersiál no industriál .

Konsellu Ministru mós aprova projetu Dekretu-Lei, ne’ebé aprezenta husi Vise-Primeiru-Ministru Mariano Assanami Sabino, ne’ebé aprova orgánika Ministériu Dezenvolvimentu Rurál no Abitasaun Komunitária nian. tanba Ministériu Dezenvolvimentu Rurál no Abitasaun Komunitária maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika sira ne’ebé define no aprova ona husi Konsellu Ministrus ba área sira ne’ebé iha ligasaun ho melloria kondisaun moris, oportunidade no asesu ba zona rurál sira, dezenvolve inisiativa hodi promove diversifikasaun atividades, kriasaun empregu iha fatin rurál, ho objetivu atu konsolida ninia estrutura produtiva.

Projetu Dekretu-Lei, ne’ebé aprezenta husi Ministru Francisco da Costa Guterres, ne’ebé aprova orgánika Ministériu Interiór nian. Tanba Ministériu Interiór maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika sira ne’ebé define no aprova ona husi Konsellu Ministrus, iha área seguransa interna, migrasaun no azilu, kontrolu fronteiras, protesaun sivíl, seguransa rodoviária no kooperasaun polisiál.

KM mós aprova projetu Dekretu-Lei, ne’ebé aprezenta husi Ministru Nelyo Isaac Sarmento, ne’ebé aprova orgánika Ministériu Juventude, Desportu, Arte no Kultura nian. Tanba Ministériu Juventude, Desportu, Arte no Kultura maka departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika, ne’ebé define no aprova ona husi Konsellu Ministrus, iha área juventude, desportu, arte no kultura nian.

Projetu Dekretu-Lei, ne’ebé aprezenta husi Ministru Gastão Francisco de Sousa, ne’ebé aprova orgánika Ministériu Planeamentu no Investimentu Estratéjiku nian. Tanba Ministériu Planeamentu no Investimentu Estratéjiku maka departamentu governamentál ne’ebé responsavel ba konsesaun, koordenasaun no avaliasaun ba polítika, ne’ebé define no aprova ona husi Konsellu Ministrus, ba área promosaun dezenvolvimentu ekonómiku no sosiál país nian, liuhusi planeamentu estratéjiku no integradu no rasionalizasaun rekursus finanseirus ne’ebé disponivel, hodi asume responsabilidade espesífika sira kona-ba implementasaun Planu Estratéjiku Dezenvolvimentu nian.

Ikusliu, Projetu Dekretu-Lei ne’ebé aprezenta husi Ministra  Santina José Rodrigues F. Viegas Cardoso, ne’ebé aprova orgánika Ministériu Finansas nian. Tanba Ministériu Finansas nu’udar departamentu governamentál ne’ebé responsavel ba konsesaun, ezekusaun, koordenasaun no avaliasaun ba polítika, ne’ebé Konsellu Ministrus define no aprova ona, ba área planeamentu, monitorizasaun no avaliasaun anuál, Orsamentu Jerál Estadu no finansas públikas nian. (*)