Fundadór Rekursu Umanus ASEAN ne’e konsidera, exijénsia Estadu Timor-Leste atu lideransa ASEAN rezolve konflitu no krize polítika militár iha Myanmar reflete konsensu “five-point consensus” (P5) ne’ebé nasaun membru ASEAN deside, hafoin golpe militár akontese no to’o agota Myanmar laiha komprimisu atu kumpre.

“Ha’u hakarak hatete, ita presiza kontribui buat ruma ba diálogu ba situasaun iha Myanmar atu hakt sai husi krize. Ha’u kompriennde vizaun ka pontu de vista membru ASEAN sira-nian, no sira-nia asaun mak presiza respeita ba konsensu “five-point consensus (P5)”, informa Bob Aubrey ba jornalista, hafoin enkontru ho Primeiru-Ministru, Xanana iha Palásiu Governu, segunda (28/08/2023),

Ba Aubrey, rezolusaun problema iha Myanmar bele alkansa liuhusi diálogu, maske lori tempu naruk.

Ba pontu lima ne’e deside ona liuhusi membru ASEAN, hafoin akontese golpe militár iha Myanmar, “five-point consensus” (P5) mak, 1) hapara inmediata violénsia iha Myanmar, 2) Kria diálogu konstrutivu entre parte relevante sira, hodi buka solusaun pasífika iha Myanmar, 3) Enviadu husi ASEAN tenki fasilita prosesu mediasaun ba diálogu ho asisténsia husi Sekretáriu Jerál ASEAN, 4) ASEAN tenke fornese asisténsia umanitária liuhusi Sentru Asisténsia Humanitária ba Jestaun Dezastre (AHA-Center, sigla inglez), no 5) enviadu espesiál no delegasaun ASEAN tenke vizita Myanmar hodi hasoru malu ho parte importante sira hotu iha Myanmar.

Tanba ne’e, Bob Aubrey mós produz ona livru ida kona-ba étika ASEAN, hanesan estudu kazu ba atensaun husi lideransa ASEAN ba kazu Myanmar, molok halo vizita dahuluk mai Timor-Leste iha fulan hirak liu-ba.

“Ha’u foin hakerek livru ida foka ba etika ASEAN. Étika liga ho situasaun iha Myanmar, ida-ne’e hanesan estudu kazu kona-ba oinsá mak situasaun étika iha ASEAN bele sai pior no difisil hodi deside, dalan los ida ne’ebé mak bele halo liuhusi desizaun ka akordu ruma ba situasaun Myanmar. Timor-Leste repreenta érika ida ho vizaun katak, situasaun demokrasia iha Myanmar bele restaura, presiza iha diskusaun entre mebru ASEAN no dalan ida mak liuhusi diplomasia presiza, maibé ita mós labele haluha kona-ba Myanmar ninia luta ba independensia hodi sai nasaun mais demokrasia ida iha rejiaun Sudeste Áziatiku”, nia afirma.

Antes ne’e, Primeiru-Ministru, Kay Rala Xanana Gusmão husu lideransa ASEAN, atu hamutuk fó solusaun ba junta militár ne’ebé mosu iha Myanmar.

Xefe Governu rasik hasoru ona Sekretáriu Jerál Organizasaun Nasaun Unidas (ONU), António Guterres hodi informa pozisaun Timor-Leste  kondena maka’as junta militár ne’ebé akontese iha Myanmar.

Timor-Leste adopta prinsípiu demokrátiku anti rejime militár iha mundu no Timor-Leste hola parte nu’udar nasaun membru CPLP no ASEAN moris iha toleránsia no dame la permite atu mosu bebeik violasaun direitu umanu iha Myanmar no rai seluk.

Myanmar hasoru krize polítika no umanidade hafoin golpe militár iha fulan-fevereiru 2021. Junta militár akuza partidu vensedór, Liga Demokrasia Nasional (NLD) ho fraude durante votasaun iha fulan-novembru 2020 to’o junta militár kaptura Prezidente Partidu NLD, Aung San Suu Kyi, hodi rezulta mós populasaun barak mate iha protestu. (*)