Tempotimor (Dili) – Parlamentu Nasionál husu ba orgaun ne'ebé tesi lia iha seitór justisa, atu fó justisa loloos ba aktu violénsia sira ne'ebé hasoru feto.   

"Governu tau osan balun, atu garante feto ne'ebé mak hasoru violénsia doméstika, sexuál, feto ho defisiénsia. Bainhira sira asesu ba tribunál, sira iha direitu para hetan asistensia husi orgaun judisiál  sira, inklui advogadu. Atu nune'e, sira nia kazu bele hetan justisa loloos," dehan Vise Prezidente Parlamentu Nasionál (PN), Maria Angelina Sarmento iha PN, Segunda (04/11/19).

Nia afirma, seitór justisa nu'udar parte ida ne'ebé atu garantia ba ema hotu nia liberdade moris, no iha seguransa ne'ebé di'ak.

"Agora ita haree ema ne'ebé ba rejistu kazu iha polísia no tribunal númeru aas. Ne'e, ita bele dehan katak, pozitivu ida. Tanba, ema iha konxiénsia ona. Bainhira akontese violénsia doméstika ne'e la'ós  problema bikan no kanuru mak lian iha uma laran. Maibé, ne'e problema estadu nian," dehan Angelina.

Deputada ne'e akresenta, bainhira iha membru familia ida mak sai vítima ba violénsia doméstika, sei la lakon de'it nia-lian. Maibé, presiza lori ba estadu atu rezolve. Tanba, violénsia doméstika ne'e krime públiku, entaun estadu mak tenke rezolve.

"Violensia doméstika labele rezolve ona ho nahe biti boot. Tanba, ne'e problema públiku. Entaun, númeru aumenta ne'e katak ema konxiénte katak ema ne'ebé komete violénsia doméstika ne'e kriminozu, no estadu tenke iha responsabilidade hodi halo investigasaun ba nia no bainhira iha faktu, nia tenke ba responsaliza iha komarka," nia tenik.

Tempotimor (Dili) – Tama tinan ida resin ona, maibé Prezidente Repúblika, Francisco Guterres Lú – Olo to’o oras ne’e seidauk iha vontade politika di’ak hodi fó posse ba membru governu nain 9 (sia) hosi partidu CNRT ho Khunto ne’ebe sei pendent to’o oras ne’e. 

Prezidente Parlamenu Nasionál (PPN), Arão Noe de Jesus Amaral hatete, nia lamenta tebes ba pozisaun politika Prezidente Repúblika nian ne’ebé tama ona tinan ida resin, maibé seidauk hakarak atu fó posse ba membru governu nain 9 ne’ebé sei pendente hela.  

“Membru governu nain 9 ne’e ita hotu lamenta. Povu mós iha rajaun atu preokupa tanba se estrutura governu mak inkompletu, ejekusaun programa sira, no planu sira sei la’o la dun  di’ak,” hatete PPN Arão ba Jornalista sira iha Parlamentu Nasionál, Dili Segunda (22/07).  

Maske lamenta tebes, maibé PPN Arão afirma katak, kestaun ne’e responde ba ida – idak nia kompeténsia katak atu fó posse ba membru governu pendente ne’e nu’udar kompeténsia Prezidente Repúblika nian. 

“Ita hotu hein, ita hotu husu no tuir Parlamentu katak persija duni kompleta estrutura governu atu nune’e servisu bele efetivu hodi atinje meta sira ne’ebé ita hakarak. Atinji tuir kompromisiu partidu politika ida – idak nian,” esplika politiku hosi partidu CNRT ne’e.  

Entretantu, antes ne’e Primeiru – Ministru (PM), Taur Matan Ruak katak sei halo esforsu hodi rezolve membru governu sira ne’ebé sei pendente hela, inflizmente enkontru ka sorumutu entre nia (PM) ho PR kuaje dala 50 ona, maibé to’o oras ne’e seidauk iha rezultadu ruma ba assuntu ne’e rasik.  

Antes ne'e Prezidente da Republika, Francisco Guterres Lu Olo husu Primeiru Ministru Taur Matan Ruak atu 'Pondera' hikas lista naran membru Governu balun ne'ebe veta husi Prezidente Republika tan ba deskonfia involve iha aktu balun. Maibe depois de CNRT husu Tribunal hasai certidaun ruma ba naran sira maka Prezidente da Republika Pendente, to'o ohin Prezidente lian la'ek nafatin. 

 

 
Tempotimor (Díli) – Komemorasaun tinan 20 Konsulta Populár nu'udar refleksaun ida ba povu Timor-Leste kona-ba dezafiu, terus, sofrimentu ne'ebé liuhosi funu naruk ida to'o referendu.
 
“Agora oinsá ita reflete akontesimentu hirak ne'ebé akontese iha tempu kotuk, para projeta ba oin, katak dezafiu ida uluk ne'e tenke sai motivasaun ba joven sira para hateke ba oin ho mehi ida, oinsá ita liberta ita-nia povu husi mukit no kiak," hatete Prezidente Parlamentu Nasionál (PPN), Arão Noe de Jesus Amaral remata misa agradesementu ba tinan 20 referendu iha Igreja Katedral, Díli, Kinta (29/08/19).
 
Nia sublina, povu Timor-Leste tomak tenke orgullu no halo reflesaun hodi hateke ba oin liuhosi loron Konsulta Populár ne'ebé iha loron 30 Agostu 2019, sei komemora ba dala ruanulu.
 
"Parabens ba povu Timor Leste no benvindu ba bainaka husi mundu ne'ebé maka prezensa hodi partisipa ita nia komemorasaun ne'e. Ha'u hein katak, husi partisipasaun sira ne'e hotu atu motiva Timoroan sira para hateke ba oin ho fiar," nia tenik.
 
PPN mós enkoraja Timoroan hotu katak, Timor-Leste nia festa tinan ruanulu Konsulta Populár lori direitu tomak ba povu Timor-Leste, to'o hetan nia soberania tasi nian totalmente.
 
"Ita tenke halo reflesaun ba ita nia tratadu Tasi Timor, ne'ebé iha Sesta 30/08/19 lokraik halo troka nota. Ne'e hatudu katak ita nia soberanu kompletu ona iha Tasi nian, nomos rai maran nian sei kompleta mós iha tempu tuir mai," nia dehan.

Tempotimor (Dili)- Prezidente Parlamentu Nasionál, Arão Noé Amarál, fiar Prezidente Repúblika, Francisco Guterres 'Lú Olo, foti desizaun lalais ba lei haat no rezolusaun ida.

Tempotimor (Dili)-Tuir klima normal, tempu udan besik daudauk ona. Tan ne'e Prezidente Parlamentu Nasional (PN), Arão Noe husu ba governu atu apoiu ba material konstrusaun ba vitima insendiunune'e bele prepara a'an hasoru tempu udan..

Tempotimor (Dili) – Deputada CNRT iha Parlamentu Nasional (PN), Virginia Ana Belo ameasa vota kontra Orsamentu Jerál Estadu (OJE) 2020, bainhira livru Panorama Orsamentál 2020  la tuir estrutura no aumentu laiha balansu.

"Ita boot sira iha esperiénsia naruk. Liuliu maluk tékniku sira. Maibé, ha'u fó de'it ezemplu ida iha transferénsia públika. Orsamentu atu halo eskola no orsamentu atu konstrui klínika. Halo nusa mak ba tau fali iha transferénsia públika?" husu Prezidente Komisaun D, Virginia Ana Belo iha plenária PN, Segunda (04/11/19).

"Sosa ró-ahi versu II tau fali iha bens no servisu. Saida mak ne'e señora ministra? Ha'u bilán tiha de'it kuandu haree livru orsamentu ida ne'e. Buat hotu ida loloos, iha kapitál menor no kapitál  dezenvolvimentu mós mai fali iha transferénsia públiku.  Tanba ne'e, osan sira ne'e presiza muda ba nia fatin. Se la muda, ha'u nia pozisaun mak vota kontra," dehan Virginia.

Nia afirma, deputadu hotu-hotu iha ninia pozisaun. Tan ne'e, nia hakarak hateten katak ne'e fora husi orientasoens. Ida ne'e, ninia deklarasaun privadu.

“Sei kolokasaun orsamentu ida sabraut ida hanesan ne'e, ha'u nia pozisaun mak hanesan ohin ha'u dehan, sei vota kontra orsamentu liuliu iha ministériu finansas," nia dehan.

Nia hatete, nu'udar deputada nia apoiu ba Governu. Tan ne'e, sei nia mesak mak vota kontra laiha impaktu. Tanba, tuir Prezidente Komisaun D ne'e, iha deputadu no deputada barak mak sei apoiu ba Governu.

"Ha'u mesak mak vota kontra laiha impaktu. Kolega deputadu barak mak apoiu ba Governu. Ne'ebé laiha impaktu," nia dehan.

Tempotimor (Dili) – Partidu Kongresu Nasionál Rekonstrusaun Timorense (CNRT) fó ultimatu ba Governu Aliansa Mudansa ba Progresu (AMP) ne’ebé lidera husi Primeiru Ministru Taur Matan Ruak, tenke hatuun montante Orsamentu Jerál Estadu (OJE) 2020 husi billaun $1.95 ba billaun $1.3.

Bainhira Governu AMP ne’ebé CNRT mós apoiu ne’e, la halo tuir, kartaun mean husi deputadu bankada CNRT iha Parlamentu Nasionál sai opsaun ikus ne’ebé partidu lideradu husi Kay Rala Xanana Gusmão ne’e sei foti iha debate OJE 2020.

Deputadu Bankada CNRT, Domingos de Carvalho deklara, pozisaun ida ne’e nu’udar desizaun bankada CNRT nian. La’os desizaun deputadu ida nian.

"Husi ami, bankada CNRT ne'ebé iha Aliansa Mudansa ba Progresu (AMP), ami deside ona katak hakarak ka lakohi tenke halo redusaun (ba OJE 2020). Maibé, se la konsege redus no mantein, mak orsamentu ne'e sei la pasa. Tanba, ita haree katak husi I Governu to'o VIII Governu, foin mosu OJE boot hanesan ne'e," dehan deputadu Domingos iha Parlamentu Nasionál (PN), Segunda (11/11/19).

Deputadu ne’e mensiona mós deklarasaun husi deputada bankada CNRT seluk, Virgina Ana Belo atu vota kontra OJE 2020. "Bainhira OJE mak la redúz, sira (governu) mantein, ne'e ami tenke vota kontra duni. Tanba, ami deklara antes ona," dehan Domingos.

Nia afirma, loloos OJE tinan fiskal 2020 nian ne'e mak billiaun $1.3 ka $1.4. “Maibé, se liu ida ne'e, pasiénsia saida mak ami deklara ona, ami sei vota kontra."

 

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com