“Bom, ne'e ha'u seidauk bele hatete agora ne'e ga, kuandu to'o iha nia tempu depois ita-boot sira sei rona ne'e ga”, informa PR Lú Olo hafoin partisipa komemorasaun loron nasionál Komisaun Funsaun Públika (KFP), ba dala-7 iha Kolmera, kinta (15/07).
Antes ne'e, portavós Grupu Estudantil Munisípiu Lautém (GEML), Vidalizia De Jesus husu ba Prezidente Repúblika (PR), Francisco Guterres ‘Lú Olo’, atu re-kandidata nia-an hodi avansa nafatin ba eleisaun prezidensiál periódu tinan 2022-2027.
“Ami nu'udar Grupu Estudantil Munisípiu Lautein hakarak hamriik hodi espresa demokratikamente ami-nia preferénsia ba kandidatura iha eleisaun prezidensiál tuir mai no ami hakarak husu ba Dr. Francisco Guterres ‘Lú Olo’ atuál Prezidente Repúblika atu re-kandidata nia-an ba eleisaun prezidensiál periódu 2022-2027”, deklara Portvoz GEML, Vidalizia De Jesus, iha Jardim 05 de Maio Kolmera, kuarta (07/07).
Tanba durante ne'e, GEML nota Úniku só PR Lú Olo sempre firme ho nia pozisaun nu'udar aman nasaun nian hodi hatudu kapasidade lideransa ba povu ne'ebé nia hadomi tebes, no PR Lú Olo ema ida ne'ebé hatudu nia konsisténsia no komitmentu iha palku-politika nomós hatudu domin forti ba nia pátria nomós nia povu.
Ho ida-ne'e mak povu Timor-Leste presiza hatene oinsá ezemplu ida-ne'e bele habelar hosi família ida ba família sira seluk.
“PR Francisco mak bele hasa'e dignidade estadu nian hodi hamate abut hun koruptór sira ne'ebé hakarak susu-mohu povu maubere nia riku-soin iha Timor-Leste, ezemplu mak promulga lei Anti Korrupsaun ne'ebé tinan barak subar hela iha gaveta guvernu anteriór”, dehan nia. (*)
