PPN Konfia PR Promulga Lalais Pakote Lejizlativa 4 Featured

PPN enkontru ho PR iha Palasiu Prezidensial PPN enkontru ho PR iha Palasiu Prezidensial Foto Arquivo

Tempotimor (Dili)- Prezidente Parlamentu Nasionál, Arão Noé Amarál, fiar Prezidente Repúblika, Francisco Guterres 'Lú Olo, foti desizaun lalais ba lei haat no rezolusaun ida.

 PPN Arão dehan, oras ne'e pakote lejizlativa hirak ne'e iha hela Komisaun B, C no D nia liman, tanba Komisaun tolu ne'e seidauk konklui aprovasaun finál. 

"Sira sei aprezenta mai, ami haree katak loos ona sei enkontru ba Prezidente Repúblika. Hanoin katak sei aprezenta lokraik ne'e, mas tékniku sira mak, sei mai sedu sei haruka kedas, se la biban aban dadersan tuku 09.00. Ha'u fiar katak Lei ne'e ba interese nasionál, Prezidente Repúblika sei foti desizaun lalais para atu solusiona situasaun ida nee", PPN, Arão Noé ba jornalista sira iha PN, kuarta ne'e. 

Tuir nia, presiza haree didi'ak hafoin enkaminha ba PR Lú Olo. 

Nia dehan, tuir konstituisaun loron 30 ba PR deside veta ka promulga 

Tanba oras ne'e Prezidente Parlamentu Nasionál ne'e sei hein hela pakote lei hirak ne'e. 

Bainhira Komisaun tolu ne'e aprezenta na meza Prezidente PN, hafoin enkamiña ba Prezidente Repúblika, Francisco Guterres 'Lú - Olo'. 

Entretantu Kapitulu II hosi Konstituisaun RDTL iha artigo 85 kona-bá kompeténsia Prezidente-Repúblika nian iha alinea C katak, Prezidente-Repúblika hala'o direitu vetu kona-bá diploma lejislativa nian, iha prazu loron 30 nia laran hahu hosi loron simu nian. 

No iha artigo 88 kona-bá promulgasaun no vetu iha número dahuluk katak, iha prazu loron 30 nia laran, hahu hosi simu diploma naran ida hosi Parlamentu Nasionál atu promulga hanesan Lei, Prezidente Repúblika bele promulga eh uja direitu vetu nian, hodi husu apresiasaun foun kona-bá lia-tatoli ne'e ho fundamental. 

Faktu hatudu katak, hafoin Prezidente-Repúblika, Francisco Guterres Lú-Olo assume nia funsaun ne'e sempre uja nia direitu vetu ba lejislasaun sira iha rai laran hanesan rejeita kandidatu membru governu sira hosi partidu CNRT ba estrutura governu atual no veta Orsamentu Jeral Estadu (OJE) 2018, veta alterasaun dahuluk Lei Atividade Petroliferu. 

Entretantu, bankada opozisaun FRETILIN hatudu ona nia pozisaun politika klaru hodi vota kontra total pakote lejislasaun 4 ne'e hahu hosi votasaun jeneralidade to'o iha votasaun final global, no kontinua vota kontra ratifikasaun fronteira tasi nian ne'ebé kontradis ho PR, Lú-Olo nia deklarasaun antes ne'e katak, sei laiha ema ida mak atu kontra tratadu fronteira tasi nian, maibé bankada FRETILIN rasik kontra tiha ona ho total votu 23.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.