Deputada CNRT, Maria Veneranda Lemos hatete, nia parte hakfodak ho deklarasaun Prezidente EDTL ne'ebé dehan seidauk kria planu distribuisaun mina no enerjia elétrisidade ba Postu Administrativu úAtaúro tanba laiha orsamentu.
“Señor Prezidente EDTL, hatete iha rádiu, dehan katak, ahi-eletrisidade lakan oras lima de'it, tanba osan laiha. Iha ne'eba mós señor prezidente hatete, planu atu distribui enejia elétika ne'e sira seidauk iha, ne'ebé agora sira atu halo planu distribuisaun enerjia elétrika, ba Ataúro, ne'e halo ha’u hakfodak”, deklara nia iha plenária PN, segunda (21/06).
Tuir lolos preokupasaun ida ne'e labele akontese tanba Orsamentu Jerál Estadu (OJE) 2020-2021, parlamentu Nasionál aprova kada programa, tanba saida mak agora foin dehan fali osan laiha, nomos foin halo planu.
Aleinde preokupasun ida seluk, kona-ba Munisípiu Dili nian maske durante ne'e instala ona liña eletrisidade, no enerjia elétrika, maibé dala barak EDTL halo deskriminasaun tanba halo lakan iha parte ida, hamate fali iha parte ida.
Tanba ne'e pozisaun CNRT hakarak husu Ataúro ne'e parte seluk ida husi Timor-Leste,no parte ida husi Munisípiu Dili ka la'e.
“Serake ulun boot sira iha governu daualu la haree ba kestaun sira hanesan ne'e, ita-boot sira sibuk ba saida”, dehan nia..
Nune'e deputadu Ricardo Batista, duvida ho orientasaun Primeiru Ministru (PM), Taur Matan Ruak, ba Prezidente EDTL kona-ba rezolve eletrisidade ba Postu Administrativu Ataúro.
“Señor Ministru mai iha ne'e hatete, ba Ataúro karik difísil oituan, sei hein karik ba Munisípiu, señor Prezidente EDTL,ep hatete katak mina ba Ataúro orsamentu laiha, Primeiru Ministru hasai orientasaun katak, tenke ser rezolve kedan, problema Ataúro ninian, husi resposta tolu ne'ebé mak iha, hatudu katak ita-boot sira mós bingun, la'ós ami de'it mak bingun”, afirma nia. (*)