Tanba, kazu tranship II Gresik ne’ebé sai polemika iha públiku, dadauk iha hela prosesu investigasaun husi Komisaun Anti korrupsaun (KAK), maibé iha loron segunda (21/06), deputadu CNRT Domingos Carvalho de Araújo hahú dun Ministru Transporte Komunikasaun (MTK), José Agustinho komete korrupsaun.

"Tenke halo los, ha’u haree maun Xanana ne'e, maun di'ak teb-tebes, mais ita-boot (deputadu CNRT) sira mai iha ne'e halo foer nia naran”, dehan Deputada Olinda Guteres iha plenária PN, segunda (21/06).

Bainhira la deteta krime korrupsaun, Xefe Bankada KHUNTO, Olinda Guteres sei ejize rekoperasaun naran Ministru Transporte no Komunikasaun (MTK), José Agustinho da Silva nian ba Deputadu CNRT Domingos Carvalho de Araújo.

"Ha’u kaer ita-boot (Deputadu Domingos Carvalho) nia liafuan iha ne'e, Komisaun Anti Korrupsaun (KAK) kuandu la hetan nia rezultadu, hau rasik mak nuntut ita-boot, (kembali nama baik)”, afirma nia.

Iha estadu ida ne'e, la'ós partidu KHUNTO mesak mak ukun, para deputadu CNRT halo akuzasaun dehan ministru korupór.

"Ema balu-balun lori osan halai ba rai liu ne'e ida ne'e los, ita-boot la ko’alia, ba ko’alia fali José Agustinho Koruptor, imi identifika tiha ona ka..?”, hatete nia.

Ho ida ne'e, Deputada KHUNTO ne'e, lakoi rona deputadu CNRT temi tan Ministru koruptór, maibé husu atu Parlamentu Nasionál bolu José Agustinho atu esplika, kona-ba ida ne’ebé mak los.

"Parlamentu iha dever atu halo xamada ba senor Ministru atubele mai koalia, tenke halo los," dehan nia.(*)