Tempotimor (Dili)-Primeiru Ministru (PM), Taur Matan Ruak, hakarak Grupu Traballu Tékniku (GTT) atu buka solusaun ba dezastre natural ne’ebé mosu iha Timor-Leste, loron 4 fulan-abril tinan 2021.
“Sua-exelénsia Primeiru Ministru bolu ha'u mai atu relata hela traballu sira ne'ebé mak atu koordena, ne'ebé Primeiru Ministru enkoraja nafatin ami atu fó solusaun ba dezastre sira liuba ne'e, e enkoraja mós ita atu buka solusaun rasik liliu enjeñeiru sira atubele mós dezenvolve téknika sira ne'ebé mak ita rasik bele halo hodi bele ajuda atu aliva todan ne'ebé mak ita sofre dia 04 liuba”, dehan Koordenadór GTT, Benjamin H. Martins, hafoin hasoru malu ho PM Taur iha ninia rezidénsia Farol, segunda (21/06).
Maibé servisu tékniku ne'ebé oras ne'e halo fahe ba nível emerjénsia ninian liuhusi limpeza no prosesu remata no hein de'it prosesu pagamentu.
Iha mós projetu 8, ida halo tiha ona iha Embaixada Japaun nia oin, konklui ona pursentu atusida (100%) hein prosesu pagamentu.
Iha tanba projetu 4, kona-ba ponte sira iha Dili laran, ne'e Komisaun Administrasaun Konsellu Administrasaun husi Fundu Infraestrutura (KAFI) mós aprova ona, hein atu lori ba prosesu aprovizionamentu no iha ida ponte CPLP nia sorin, geometrikamente ultrapassa altura ne'ebé mak ba mai uza, kuaze metru 13, ne'ebé nia solusaun téknika ne'e sei iha prosesu estuda hela, maibé besik remata, atu lori ba Agência Dezenvolvimento Nasional (AND).
Enkuantu, kona-ba ponte Loes, tanba ninia kompleksidade boot, nune'e husi parte Project Management Unit (PMU) estadu sei dezeñu ba ponte.
Aleinde ne'e, sei halo identifikasaun tanba dadus husi estragu sira iha kapitál Dili, nomós iha munisípiu Manatutu, Likisá ho Bobonaru, inklui parte Kosta Sul.
“Sei identifika hela dadus ho fatin, rekolla dadus hodi halo dezeñu ba rekuperasaun infraestrutura sira ne'ebé mak aat. Dadus sira ne'e, iha relasaun liu ho tékniku, avalia halo nusá, estrada mak at ka, presiza troka hotu ka, ou hadi’a balu de'it, rekolla hela, depois husi dadus sira ne'e mak sei fó solusaun téknika tuir estragu sira”, dehan nia.
Entretantu, GTT enjeñeiru timoroan sira iha Obras Públika hahú dadauk atubele dezenvolve rasik kapasidade ne'ebé hodi fó solusaun imediata ba impaktu dezastre natural. (*)
