Komadante Komandu PNTL Munisípiu Baukau, Superintendente, António De Sá, membru hirak ne'ebé dadaun idade avansadu no moras permanente, durante Komandu la involve sira iha kestaun operasaun, tanba ne'e presiza reforma hodi rekruta fali membru foun hodi responde ba liafuan efikas no efisiente iha tereñu.

Espera, iha tinan-2023, Governu liuhusi Ministru Interior (MI) bele halo tán rekrutamentu ba membru PNTL, tanba haree ba estatutu pesoal PNTL nian, membru barak mak tama ona ba idade reforma, inklui moras permanente.

"Dala barak ita haree ema barak, maibé nia efetivu ne'e oituan de'it, lei estatutu pesoal fó ona dalan atu halo reforma, tanba ne'e ha'u fiar katak ita nia Primeiru Ministru, tantu hanesan Ministru Interior, di'ak liután foti medida ba buat sira ne'e," dehan nia iha resintu Administrasaun Baukau, Kinta (20/01).

Wainhira Governu liuhusi Ministériu Interior halo reformadu ba membru PNTL ne'ebé idade-60, no moras permanente la tama servisu, iha Komandu PNTL Baukau, membru na'in-10 resin mak sei hetan reforma.

"Iha Baukau ne'e, pur-volta ema na'in-10 hanesan ne'e ou liu, balun idade avansadu, balun moras permanente to'o ona tinan-10, ita presiza ona haree estatutu pesoal tenke deside ona sira nia estatutu, para fó fali fatin ba foun sira", nia informa

"Ita ko'alia kona-ba kuantidade barak, mais kualidade ne'e ema ladun barak, idade ladun poténsial ona, entaun sira deskansa de'it komandu la involve sira iha kestaun operasaun", nia afirma

Tuir lei estatutu PNTL difini klaru ona katak, membru ne'ebé idade-60 obrigatóriu tenke reforma. (*)