Deputadu UDT, Francisco David hatete, prosesu rekonsilasaun la siznifika nia timoroan atu hetan oportunidade hanesan, tanba rekrutamentu ne’ebé la’o kandidatura balu família iha hela nasaun seluk.
“Rán timoroan, husar talin bele ko’a iha Timor, la siknifika fuan husi timoroan, ha’u ko’alia ne'e relasaun ho rekrutamentu ba F-FDTL ho PNTL ne'ebé agora dadaun ne'e, informasaun ne'ebé tama, ema ne'ebé agora dadaun sira iha liur, sira-nia oan mak kandidatu”, deklara nia iha plenáriu Parlamentu Nasionál, segunda (21/6).
Kazu rekrutamentu F-FDTL ne'e, iha semana rua liuba, levanta tiha, oinsá atu toma atensaun didi'ak ba instituisaun rua ne'e.
Bainhira F-FDTL no PNTL fó oportunidade ba futuru timoroan ne’ebé kontra ukun-an sei domina iha instituisaun rua.
“Tanba uluk sira hatete liafuan sira, imi halo ba, aban bainrua mak ami-nia oan sira mós sei ba ukun ita”, dehan nia.
Tanba veteranu nia oan barak to'o agora oportunidade laiha. “Ha’u nu’udar reprezentante UDT iha ne'e, rona sira-nia halerik bebeik, ita atu ba loos ne'ebé ho situasaun sira hanesan ne'e”, afirma nia.
Nune'e, Deputada Bankada Fretilin, Elena Martins apoiu ejizénsia deputadu UDT nian atu tau duni atensaun máximu ba rekrutamentu iha instituisaun F-FDTL no PNTL.
“Ha’u mós apoiu kona-ba UDT ninia lamentasaun kona-ba rekrutamentu ba F-FDTL no PNTL, presiza tau duni atensaun hodi hadi'a, se la’e aban bainrua ema ne'ebé uluk la gosta ukun-an ne'e mak sei domina, e sei halo tuir hotu sira-nia hakarak”, hatete nia.
Rekrutamentu ba kandidatura sira, labele haree de'it veteranu nia oan laiha oportunidade ba eskola, laiha oportunidade di'ak hanesan sira seluk, atu abandona nafatin. (*)