Ministru Transporte Komununikasaun(MTK), José Agostinho Da Silva hatete, liuhusi distribuisaun sertifikadu ne'e oinsá governu promove no fasilita kompaña hodi fó situasun ne'ebé mak serteza ba sira nia estatutu antes sira fó atendementu ba klientes.
"Prosesu atribuisaun sertifikadu ba kompaña Globalnet ne'e, tuir dekretu lei númeru 15 artigu 30 ne'ebé fó espasu ba kompaña sira bele rejistu oinsá sira prenxe rekezitu ne'ebé lei haruka”, dehan José Agostinho iha Salaun ANC, Mercado Lama, tersa (20/04).
Alende kompaña halo atendementu, iha parte seluk sira mós kumpri sira-nia dever ba kofre estadu.
"Entaun ita governu oinsá mak bele formaliza kompaña sira nia ezistensia ho estatutu ne'ebé mak formál tuir dekretu lei,antes sira halo atendementu ba sira-nia kliente”, dehan Ministru.
Iha fatin hanesan, Adjuntu kompaña Globalnett, Alexandre Pires Mendes hatete, sira kontente ho distribuisaun sertifikadu ne'e tanba iha situasaun ida hanesan ne'e governo bele halibur sira hodi alkansa oinsá sira bele la'o tuir prosesu legal.
"Ida ne'e primeiru etapa ne'ebé ami bele hetan sertifikadu rejistu, tuir mai ami sei rona de'it parte orgaun kompatente hanesan ANC hodi oinsá mak orienta passu tuir mai no saida mak ami halo ami prontu no ba oin ami sei servisu hamutuk ho di'ak”, dehan nia.
Kona-ba tempu lalais di'ak liu wainhira sira halo operasaun maibé sira sei kordena ba parte hothotu hafoin sira bele halo operasaun. (*)