Tuir informasaun ne’ebé www.tempotimor.com, asesu iha pájina JICA, sábadu (30/07) katak, semináriu ne’e ho objetivu hosi seminar ne’e atu hasa’e koñesementu, advokasia, no hametin katak feto mós bele kaer papel iha área Siensia, Teknolojia, Enjiñeria no Matemátika (STEM), no atu enkoraja liután feto sira atu servisu iha área hirak ne’e.

Ministru Obras Publikas, Abel Pires da Silva, Ministru Transporte no Komunikasaun, José Agostinho da Silva, profisionáls TIC sira partisipa iha semináriu ne’e.

Xefe Reprezentante JICA Timor-Leste, Ko GOTO, introduz ezemplu balun husi Japaun nia kooperasaun ho Timor-Leste iha área TIC nian nune’e mós  kontinuasaun husi kooperasaun ho Faculdade Enjeñaria Siensia no Teknolojia (FEST-UNTL) desde 2002.

Iha FEST-UNTL ninia membru husi fakuldade hamutuk 11, inklui feto na’in-2, partisipa ona iha programa treinamentu kurtu prazu iha Universidade GIFU iha Japaun.

Liuhusi ne’e, JICA hakarak enkoraja feto sira atu ativu liután iha área TIC. Aliende ne’e, JICA mós hala’o ona treinamentu ba Seguransa Sibernétiku iha Indonézia desde tinan 2016 ne’ebé partisipa husi ANC no UNTL, no tuir mai sei hala’o iha Bali iha Outubru 2022.

Iha tempu badak disiplina seguransa sibernétiku sei aplika iha UNTL no iha espetetativa katak estudante feto barak mak sei atende disiplina ne’e, nune’e bele kontribui ba dezenvolvimentu Timor-Leste. (*)