Prima sai Embaixadora, PM Taur: Seluk nia Prima iha Hotu Laran Featured

Primeiru Ministru VIII Konstitusional, Taur Matan Ruak Primeiru Ministru VIII Konstitusional, Taur Matan Ruak Foto Midia PM

Tempo timor (Dili) - Primeiru Ministru Taur Matan Ruak hatete nia konkorda atu nia prima, Joana Veneranda Amaral, sai embaixadora Timor Leste iha Santa Sé, Vatikanu, tanba molok ne'e bainhira nia sei asumi kargu nu'udar Prezidente Repúblika nia veta nia prima ne'ebé naran tama iha lista embaixadór.

Tuir PM Taur, diplomatikamente dehan. nia prima laos ema uniku iha funsionalizmu públiku nia laran, tanba ema seluk nia prima mós iha hotu.

“Ha'u hanoin bele, ha'u konta, uluk ha'u iha Prezidente Republika veta tiha, ha'u veta tiha nia la ba, foin dadauk ministru foun aprezenta fila fali, ha'u labele veta dala rua, tanba ha'u-nia prima, ha'u tenke veta nia. Kuandu seluk nia prima hotu iha hotu laran, imi ba haree iha funsionalizmu públiku ne'e, ne'ebé ha'u veta dala ida de'it, segunda vez ha'u la veta ona”, deklara PM Taur iha palásiu Prezidensiál Bairu-Pite, Segunda (10/06/2019).

Molok ne'e, Tuir dokumentu ofisial husi palasiu governu ba lista kandidatu embaixadór na'in 15 ne'ebé governu aprezenta ba Prezidente Repúblika ne'ebé tempotimor asesu, iha mós naran husi PM Taur nia prima, Joana Veneranda Amaral.

PM Taur nia prima ne'e hetan nomeiasaun hodi reprezenta Timor Leste nu'udar embaixadora iha Santa Sé, Vatikanu.

"Senhora Joana Veneranda Amaral, embaixadora da Republica Demorcratica de Timor Leste na Santa Sé," hakerek iha karta ho lian Portuges ne'ebé asina husi PM Taur.

Ho realidade ne'e, hahú mosu preokupasaun kona-ba "malisan" fahe ukun ne'ebé daet ona ba PM Taur.

Fó hanoin fila fali ba deklarasaun Taur Matan Ruak iha 25 Fevereiru 2016 bainhira sei asumi kargu nu'udar Prezidente Repúblika. Iha tempu ne'eba Taur hato'o deklarasaun forte ida ba ukun-nain sira.

Iha tempu ne'ebá bainhira hato'o mensajen iha Parlamentu Nasionál, Taur deklara katak nia aviza ba Primeiru Ministru Rui Maria de Araujo relasiona ho informasaun husi ema balun ne'ebé hatete ba nia katak familia Xanana ho Mari Alkatiri nian no nia amigu sira hetan previlejiu barak liu iha kontratu estadu nian.

"Ha'u iha 4 Fevereiru aviza no pasa informasaun ba Sr. Primeiru Ministru (Rui), ema mai ko'alia ho Prezidente Repúblika lamenta, hateten katak familiares Maun Xanana no Mari (Alkatiri) nian ho nia amigu sira hetan previlejiu barak liu iha kontratu estadu nian. Sr. Primeiru Ministru husu "Prezidente Repúblika hakarak halo inspesaun?" Ha'u dehan lae. Ha'u hakarak fó ba ita-boot par hatene katak iha dezkontentanamentu kona-ba previlejiu sira ne'e."

"Suharto (eis Prezidente Repúblika Indonezia), nia familia sira mak hatun nia. Previlejiu demaziadu," deklara Taur iha altrua ne'ebá.

Maibé hafoin kaer ukun iha Governu Aliansa Mudansa ba Progresu (AMP), Taur mós tama ba "kuak" ne'ebé hanesan. PM Taur nia prima ne'ebé nu'udar eis madre ida hetan mós previlejiu ba kontratu estadu nian husi ukun ida ne'e.

Aviza ne'ebé uluk Taur Matan Ruak "dedika" ba Xanana ho Alkatiri no deklara ho orgullu iha uma fukun Parlamentu Nasionál hanesan fila hikas ba "nain".

Rate this item
(5 votes)
Last modified on Tuesday, 11 June 2019 10:58
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com