Tuir informasaun ne’ebé www.tempotimor.com, asesu iha pájina média untl, kinta (24/08/2023) katak, liuhusi sesaun abertura nian, Proreitora ba Asunto Provedória e Aconselhamento (PRAPA), Teresa de Jesus Vaz Cabral hatete, semináriu ne’e importante hodi partilla informasaun ba esforsu no progresu Timor-Leste nian hodi sai membru ASEAN (The Association of Southeast Asian Nations).
“Esforsu hirak ne’ebé Timor-Leste hala’o ona hodi adere ba ASEAN no sira mós hatuur pilar tolu kona-ba polítika, ekonomia, sosio-kulturál. Tanba ne’e, UNTL hanesan akadémika hola parte iha sosio kulturál nune’e sira mai atu sosializa de’it sira-nia progresu ba sivitas akadémika universidade nian hodi kompete no la’o tuir kritéria ne’ebé nasaun sira seluk tuir nu’udar membru ida”, dehan Teresa.
Entretantu Diretora Jerál Interina ASEAN husi MNEK, Elisa Maria da Silva hatete, objetivu husi semináriu ne’e atu partilla informasaun liu-liu kona-ba prosesu adezaun ba ASEAN, ligadu ba kritéria ne’ebé adopta ona ba Timor-Leste hodi implementa ho nune’e estudante sira bele hatene progresu no preparasaun.
“Ohin loron ita-nia setór hotu liuliu pilar tolu kona-ba asuntu seguransa, ekonomia no sosiál, nune’e prepara an di’ak liu oinsá ita-nia adezaun ho di’ak. Kooperasaun ne’e mós la’ós ita de’it maibé ita mós hetan apoiu tomak husi membru ASEAN nian hodi prepara an di’ak liután no espera iha tinan hirak mai ita bele sai ona membru ba ASEAN”, dehan Elisa.
Oradór Manuel da Costa e Silva hatete, nia parte aprezenta materia kona-ba seguransa polítika relasaun ho kriteria adezaun nian ne’ebé sai matadalan atubele servisu maka’as hodi Timor-Leste bele avansa iha polítika, seguransa sai nu’udar membru ASEAN.
“Ha’u espera katak materia ne’ebé ami partilla la’ós buat foun, maibé atu fó hanoin fali no haklean liután informasaun relativa ho asuntu ne’ebé ami lori. Ha’u kontente tebes bele haree estudante sira ho entusiazmu hakarak mai atu hatene liuliu prosesu Timor-Leste hodi adere ba ASEAN. Apresia tebes ba estudante sira-nia pergunta ne’ebé kritiku no ezije hodi ami bele haklean liután liuhusi dezenvolvimentu no prosesu sira’’, dehan Manuel. (*)
