Primeiru Ministru Taur Matan Ruak hatete, governu mós preokupa ho kazal Timor-oan ne'ebé daudauk ne'e detein iha Indonezia tanba lori droga ho tipu ekstasi miligrama rihun 1 resin tama iha teritoriu Indonezia.
Maibé, Xefe Governu ne'e dehan, preokupasaun ne'e labele ultrapasa legalidade entre nasaun rua.
"Klaru ke ami hotu preokupa, simplesmente ita hotu nia preokupasaun labele ultrapasa legalidade ne'ebé halo, tanba preokupasaun buat ida no legal buat seluk, tanba ita ne'e estadu direitu demokrátika tanba ita trata hela relasaun nasaun ida nia, laos ita iha laran de'it," dehan PM Taur iha palásiu Prezidensiál Bairu-Pite, Segunda (10/06).
PM Taur esplika, bainhira TL hakarak atu lori fila ninia sidadaun ne'ebé komete krime iha teritoriu Indonezia, tenke iha akordu ida ne'ebé hanaran akordu extradisaun.
"Primeiru, ita laiha akordu estradisaun ho Indonezia, uma vez que laiha akordu estradisaun signifika karik ita hakarak lori fila mai, ita tenke iha akordu ida. Indonezia labele foti fó de'it mai, ne'e imposivél tanba ne'e mak ita haree evolusaun ne'e la'o oinsa", dehan primeiru mimistru.
Nia hatutan, Governu mós kontinua haree posesu saida mak bele hato'o ba iha ne'ebá, tanba la'os fasil bainhira iha ona kazu ida.