Tuir informasaun ne’ebé www.tempotimor.com, asesu iha pájina Mídia UNTL, segunda (21/08/2023) katak, serimónia asina akordu kooperasaun ne’ebé, iha Salaun Ministériu Negósiu Estranjeiru no Kooperasaun (MNEK), Praia dos Coqueiros, sesta (18/08/2023).
Iha asina akordu ne’e, Reitór UNTL hatete, kooperasaun refere foku ba mestradu iha área edukasaun nian, tanba ne'e UNTL kontente tebes, liuhusi kooperasaun ne'e bele tulun dosente sira hasa’e sira-nia nível estudu.
“Ohin serimónia asina akordu ida importante tebes ho Embaxadór Brazil hodi koopera iha mestradu ba área edukasaun nian, no dadaun ne'e hahú ona ho estudante 33, tanba ne'e ami sente kontente tebes bele tulun ami-nia dosente sira hodi priense kritériu, tanba mínimu sai dosente tenke ho grau mestradu”, dehan Reitór João Martins.
Entretantu Embaxadór Brazil nian iha Timor Leste, Mauricio Medeiros de Assis hatete, kooperasaun ne'e fasilita servisu hamutuk ho Universidade Federal Santa Catarina Brazil, hodi envolve profesór brazileiru sira troka esperiénsia entre parte rua iha área mestradu no pós-graduasaun nian.
“Ohin asina akordu ho UNTL, ba oin sei servisu hamutuk ho Universidade Federal S. Catarina Brazil, liuliu ho profesór brazileiru sira hodi troka esperiénsia iha área mestradu no pós-graduasaun nian. Tanba ne'e ami orgullu tebes hodi hahú forma ona rekursu akadémiku no kria liña peskiza akadémika, espera katak bele kapasita di'ak liután timoroan sira liuhusi kooperasaun ida-ne'e”, haktenik Embaxadór.
Aleinde asina akordu ho UNTL, Embaxadór Brazil nian iha Timor Leste, asina mós akordu ho Ministériu Negósiu Estranjeiru no Kooperasaun nian, Bendito Freitas dos Santos hodi koopera iha área edukasaun nian iha Timor-Leste.
Selebrasaun akordu ne’e partisipa husi Pro-reitór ba Asuntu Kooperasaun nian, Tomé Xavier Jerónimo, Vise-reitór ba Asuntu Estudantís, Lígia Tomás Correia, Vise-reitór ba Asuntu Pós-Graduasaun no Peskiza, Profesór Afonso de Almeida, Dekanu Fakuldade Edukasaun Arte no Umanidade, Teodoro Soares, dosente, ekipa tékniku no konvidadu sira seluk.
