Traballador na'in-350 ne'e tuir planu atu rekruta timor-oan oan de'it.
Prezidente Timor Port, Rafael Ribeiro informa, tinan ida ne'e halo rekrutamentu ne'e ba traballadór sira-ne'ebé atu serbisu operasionál nian bainhira Portu Tibar remata.
"Ami mós iha tinan ida-ne'e nia laran sei halo rekrutamentu ba ema ne'ebé aban bainrua atu serbisu, rekrutamentu seidauk hatene loloos, maibé entre 300 to'o 350 tenke Timor-oan," dehan nia hafoin sorumutu ho Primeiru Ministru Taur Matan Ruak, iha Palásiu Governu, segunda (02/02/21).
Rekrutmentu ba tinan ida-ne'e ba operasaun, la'ós rekruta ba serbisu konstrusaun.
"Konstrusaun agora sira la'o daudaun ona, falta de'it balun ne'ebé mak presiza espesialidade tékniku sira ne'e sei lori mai husi xina, ne'ebe tempu badak se governu autoriza sira sei mai 100-ital atu kompleta konstrusaun sira-ne'e, maibé agora ita planu ne'e ba operasaun ninian", dehan nia.
Nune'e mós sei públika kona-ba lala'ok Portu Tibar nian ba publiku atu komprende progresu.
"Ami sei públika buat barak ba publiku para ema hotu komprende, tanba buat barak sei diferente entre portu agora ho portu ba futuru nian presiza esplika buat sira-ne'e ba publiku", tenik nia.
Nia afirma, traballadór ne'ebé daudaun hala'o hela serbisu iha Portu Tibar ne'e hamutuk kuaze 1000-ital kompostu husi timor-oan ho ema estranjeiru, no timor-oan kuaze 500-ital.
Konstrusaun Portu Tibar tuir planu Loloos ne'e konklui iha tinan 2021, maibe ho situasaun Covid-19, entaun tarde ituan.
Maibé parte sira halo ona relatoriu ba governu no hetan aseitasaun governu nian ba kondisaun, nune'e sei konklui konstrusaun Portu Tibar ne'e iha tinan 2022.
Hahú inisiu konstrusaun Portu Tibar investe ona orsamentu tokon $100-resin, no konstrusaun atinje ona pursentu 42. (*)