“Maun Xanana mós horiseik (31/07) ko'alia ho nia, nia hatete, nia preokupasaun mak ida-ne'e mantein dame iha rai-laran, husik Governu avontade labele kria problema”, hatete Horta hafoin halovizita Kortezia ba Armajen SAMES iha Kampu Alor, segunda (01/08).
Xanana fó ideia ida-ne'e, bainhira haree ba situasaun internasionál ne'ebé oras ne'e dadaun difísil loos, tanba haree folin kontentór mós sa'e, ró-ahi hakarak atu mai merkadória iha Timor-Leste mós difísil.
Dadaun Timor-Leste mós iha ona Portu Internasionál ne'ebé lokaliza iha Tibar no lakleur tan sei muda ba portu foun, iha fulan-novembru 2022.
Tanba ne'e hanesan notísia di'ak ida, Portu foun iha Tibar ne'e estandar internasionál, nomós iha atividade seluk tan ne'ebé atuál Governu bele halo no tenke kontinua.
Maibé husu Governu atu labele hanoin fali ba eleisaun 2023, tanba bele difikulta ezekusaun orsamentu la'o neneik.
“Purtantu ne'e mak ha’u-nia preokupasaun. Ha’u-nia espetativa mak ida-ne'e, Governu atuál labele distraksi ho eleisaun 2023, konsentra ba ezekusaun orsamentu”, afirma nia.
Iha tinan 2022, ezekusaun orsamentál tenke la'o di'ak tanba Governu mós kria dadaun ona prioridade ba 2023, no sei hatama orsamentu ne'e iha fulan-setembru atu hahú diskute iha Parlamentu Nasionál, iha fulan-novembru.
“Aprovsdu normalmente iha dezembru, depois iha fulan ruma para ezekuta Orsamentu 2023, ne'e mak ha’u hatete ba Governu ita-nia preokupasaun mak ida-ne'e”, haktenik nia.
Ba eleisaun Parlamentár ne'ebé sei akontese iha 2023, felismente nu’udar ema Polítiku, sira sei foku mós ba eleisaun maibé nu’udar Xefe Estadu husu Membru Governu sira atu kaer kna'ar didi'ak tanba ne'e orsamentu estadu ian.
“E 2022-2023 ekonómia difísil loos iha mundu, la’ós Timor de'it, tanba ne'e ha'u rasik halo esforsu para fó hanoin Governu”, hatete nia. (*)