Tuir informasaun ne'ebé www.tempotimor.com asesu iha Pájina Ofisiál Ministériu Finansas (05/01) katak, durante fulan-outubru to’o fulan-novembru 2022 Ró kontentór hamutuk 24 mak atraka iha Portu Baía Tibar, ️husi Ró kontentór 24 ne’e, rendimentu ba Governu Timor-Leste liuhusi tarifas konsedente (taxa navegasaun no taxa atrakasaun) no pagamentu pur tráfegu (royalty tax) hamutuk US$195,5 mil.
Portu Baia Tibar halo operasaun hahú ona iha 30 fulan-setembru no ofisialmente inaugura husi Prezidente Repúblika, José Ramos Horta hamutuk ho Primeiru Ministru, Taur Matan Ruak, iha 30 fulan-novembru tinan 2022.
Iha 21 fulan-dezembru 2022, Konsellu Ministrus aprova ona variasaun ba kontratu konsesaun hodi halo akizisaun ba mákina X-Ray Scanner hodi fasilita operasaun Portu Baía Tibar ho konstrusaun infraestrura relevantes ho montante investimentu US$4,4 milhões.
Membrus Project Steering Committee Ministru Finansas, Ministru Obras Públikas no Ministru Transporte no Komunikasaun reprezenta Governu Timor-Leste asina akordu konsesaun ho kompaña Timor Port iha fulan-dezembru 2022.
Traballadór permanente ne’ebé rekruta ona hamutuk ema 70 husi nia tarjetu ema 200. Husi númeru ne’e traballadór husi Portu Díli hamutuk ema 38 no traballadór komunidade lokál husi Suco Tibar no Suco Ulmera hamutuk ema 32.
Aleinde traballadór permanente, sub-kontratór sira hanesan kompaña Sentinel, PAX no CNEFP mós emprega traballadór na’in 76 husi Suco Tibar no Suco Ulmera.
Totál traballadór lokál husi Suco Tibar no Suco Ulmera ne’ebé daudaun servisu iha Portu Baia Tibar hamutuk ema 108. (*)