Objetivu hosi ratifikasaun ne'e atu Timor-Leste adere sai membru ba konvensaun ne'ebé harii iha 1985 ne'e.

Proposta-rezolusaun n.º3/V(2ª) kona-ba adezaun Timor-Leste nian aprovadu ho rezultadu votasaun a-favór 31, kontra 0 no abstensaun 3.

"Ho nune'e proposta-rezolusaun ne'e pasa ho votu maioria," Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Lopes Sarmento, anunsia liuhosi plenária, PN, tersa ne'e.

Proposta-rezolusaun ne'e aprezenta hosi Ministériu Negósiu Estranjeiru no Kooperasaun (MNEK).

Konvensaun rekoñesimentu no ezekusaun sentensa abritrál estranjeira ne’e selebrada iha Nova Iorke, iha loron 10 juñu 1985. Iha konvensaun vigora ho versaun inglés, xinés, españa, francês no Rússia ne’ebé sai ona arkivu Organizasaun Nasaun Unida (ONU) nian.

Konvensaun rekoñesimentu no ezekusaun sentensa arbitrál estranjeira importante ba Timor-Leste.

Maske konvensaun ne'e aprovadu maibé deputadu sira hosi Bankada CNRT deside lakohi partisipa iha prosesu votasaun ba proposta-rezolusaun ne'e.

Ministru Prezidénsia Konsellu Ministru Fidelis Manuel Leite Magalhães, esplika konvensaun ne'e ba de'it área komersializasaun.

Nia fó ezemplu, sidadaun Timoroan ida disputa komesiál ho sidadaun Afeganistaun maibé Afeganistaun la hola-parte iha konvensaun ne'e, bainhira sira na'in-rua lori diputa ne'e ba iha Tribunál arbitrajen Singapura, no desizaun tún husu sidadaun Timoroan ne'e tenke selu.

Nune'e Timoroan ne'e fila tiha no lakohi selu ona maske iha inisiu voluntariamente nia hola-parte.

"Saida mak akontese sidadaun afeganistaun ne'e mai tuir Timor atu lori Timoroan ne'ebé halai sai hosi responsabilidade ne'e, maibé justisa ita-nia sei rezeita tanba estadu Afeganistaun la hola-parte iha konvensaun ne'e," hateten Ministru Fidelis.

Ho nune'e, Ministru Prezidénsia Konsellu Ministru ne'e afirma, nasaun hotu-hotu ne'ebé hola-parte Timor-Leste rekoñese bainhira hasoru kazu komersiál ruma maibé nasaun ne'ebé la hola parte Timor-Leste sei la rekoñese.

Prezidente Komisaun A (Justisa no Konstitusionál), Deputadu Joaquim dos Santos "Boraluli" esplika rekoñesimentu no ezekusaun sentensa abritrál estranjeiru ne’e importante ba Timor-Leste.

Ezisténsia konvensaun ne’e atu regula dispozisaun legál sira hotu tanba importante liu iha sosiedade kona-ba moris no asegura protesaun legál ba parte sira-ne’ebé iha relasaun jurídika, inklui relasaun jurídika atividade ekonómika nian. (*)