Haree ba udan no anin boot ne’ebé akontese iha loron sábadu no domingu (03-04/04) konsege hamosu inundasaun iha Kapitál nasaun inklui mós Munisípiu sira halo komunidade barak mak lakon hela fatin no iha balun mós lakon vida.

“Inundasaun ne’e mós akontese iha Díli ba ema ne’ebé lakon hela fatin ema hamutuk rihun-hitu to’o ualu. No fatin ba emerjénsia sira hamutuk 12. Maibé númeru sira ne’e bele tun no sa’e depende, mais dadus agora mak ida ne’e”, informa Fidélis hafoin enkontru ministerial iha Palásiu Governu, segunda (05/04).

Nia dehan, inundasaun ne’e akontese iha territóriu tomak, la’ós de’it iha Díli, maibé iha Munisípiu sira hotu, ne’ebé rejulta ho númeru família barak lakon hela fatin. Maibé iha Díli governu iha ona númeru provisóriu.

“Ita-boot sira akompaña katak númeru boot liu mak iha Dom Bosco iha ema 2487 no família 500-resin. Iha Kaikoli ema na’in 815, família 180. Ministériu Finansas iha família 656, iha Liceo iha ema na’in-528, iha Formosa ema na’in-30, iha INFORDEPE família 120-resin, igreja Bidau família 35, klinika Bairopite neen no seluk tan iha madre selesiana Balide no Seroja Komoro iha totál ema hirak ne’e mak to’o rihun 7 to’o 8 ne’e”, dehan Fidélis.

Fidélis afirma, númeru hirak ne’e sei provizóriiu hela, tanba iha família balun ne’ebé hela no iha balun fila ona depende ba konfisaun iha sira-nia hela fatin.

Tanba ne’e, Governu mós deside ona katak apoia umanitária sira sei kanaliza tuir Sekretáriu Estadu Protesaun Sivíl, no husu ba ema ne’ebé hakarak fó apoiu umanitária bele hakbesik-an ba sekretáriu refere atbele kanaliza apoia ba vítima sira presiza iha momentu ne’e. (*)