KM Aprova Rezolusaun Lori Kompañia Aviasaun Australia Investe iha TL

Sorumutuk Konsellu Ministru iha palasiu Governu Sorumutuk Konsellu Ministru iha palasiu Governu Foto File

Tempotimor (Dili) - Reuniaun Konsellu Ministru aprova rezolusaun ida hodi halo akordu ho nasaun Australia atu lori kompañia aviasaun tama mai Timor-Leste.

Ministru Prezidensiál Konsellu Ministru, Fidelis Leite Magalhães hateten, rezolusaun ne'e hetan ona aprovasaun maka projetu kona-ba Proposta Rezolusaun ba Parlamentu Nasionál, ne’ebé Ministra Negósius Estranjeirus no Kooperasaun, Adaljiza Magno, ba ratifikasaun Akordu kona-ba Servisu Aéreu entre Govenu Timor-Leste no Governu Austrália.

Fidelis dehan objetivu husi akordu ne'e maka atu asegura liután nivel seguransa no protesaun internasionál, hodi reafirma ninia preokupasaun séria ba hahalok no ameasa kontra seguransa aviaun sira-nian, ne’ebé fó risku ba ema no propriedade nia seguransa, afeta maka’as ba funsionamentu transporte aéreu nian no konfiasa públiku nian ba seguransa aviasaun sivíl nian.

Tuir Governante ne'e dehan akordu refere buka mós atu promove sistema aviasaun internasionál ida-ne’ebé bazeia ba konkorrénsia entre empreza transporte aéreu nian sira iha merkadu, hodi enkoraja empreza sira-ne’e atu dezenvolve no implementa servisu hirak ne’ebé kompetitivu no inovadór.

"Ohin Konsellu Ministru aprova proposta rezolusaun ne'ebé aprezenta husi Ministra Negosiu Estranjeiru kona-ba akordu kooperasaun entre Governu Timor-Leste ho Governu Austrália," dehan nia, hafoin reuniaun Konsellu Ministru, iha Palásiu Governu, Kuarta (22/07).

Iha fatin hanesan, Ministra Negósiu Estranjeiru no Kooperasaun (MNEK), Adalzija Magno hateten, akordu ne'e atu fasilita entre Timor-Leste ho Austrália atu halo servisu Air Service Agrmeand no akordu bilateral ne'e sei halo ratifikasaun iha Parlamentu Nasionál tanba, parte husi Austrália ratifika ona.

"Agora ami husu rezolusaun ba governu ho Parlamentu Nasionál atu parte rua ne'e halo hotu ratifika ba nota atu akordu entre en vigor", dehan nia.

Nia esplika, lala'ok akordu ne'e atu fo oportunidade ba Austrália bele lori nia kompañia aviasaun mai tanba, aviaun agora ne'e sei nafatin aluga husi governu.

Akordu ne'e la'os halo de'it ho Austrália, maibe ba oin sei halo mos ho Singapura no Nova Zelándia. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.