Governu Apoiu tan Sasan no Hahan ba Kada Uma-kain

Ministru Prezidensial Konsellu Ministru Fidelis Leite Magalhães Ministru Prezidensial Konsellu Ministru Fidelis Leite Magalhães Foto Ofisial

Tempotimor (Dili)-Konsellu Ministru aprova proposta ida ne'ebé aprezenta husi Komisaun Rekuperasaun Ekonomika ho intesaun atu apoiu tan sasan bazika no hahan ba kada uma-kain iha territoriu Timor-Leste. Iha apoiu faze daruak ne’e, laiha limitasaun bazeia ba rendimentu, katak uma-kain hotu-hotu sei simu.

Ministru Prezidensial Konsellu Ministru Fidelis Leite Magalhães hatete, apoiu ida ne'e iha faze rekuperasaun ekonomika ne’ebé sei oferese ba kada uma-kain iha Timor laran tomak.

Tuir Fidelis, aprovasaun ida ne’e hanesan medida tempu badak ka kurtu prazu ba mitigasaun ba impaktu krize ekonomika ne'ebé mak mosu tanba Covid-19.

"Governu deside husi aprovasaun ida ohin atu atribui sasan alimentar sira, hahan, sasan ba ijene pesoal hanesan sabaun, alkol, i hirak ne'e bolu sesta bazika iha pakote, inklui mós hanesan ai-han, ou sesta bazika ne'e hanesan opsaun ida, no opsaun ida mak governu atu fó vale de kompras relativu ho sasan hirak ne'ebé mak ho intensaun atu fasilita populasaun uma-kain sira hotu atu hetan sasan sira ne'ebé presiza," dehan Fidelis liu husi konferensia imprensa hafoin reuniaun Konsellu Ministru iha palasiu governu, Kuarta (29/07).

Nia esplika, apoiu faze primeiru ho subsidiu $200 ne’e bolu faze estabilizasaun, no iha faze daruak mak apoiu sasan ne'ebé bolu faze sesta bazika.

"Se ita-boot sira lembra faze inisial ne'ebé uluk halo ne'e ita hanaran faze estabilizasaun, depois agora tama faze rekoperasaun i depois iha faze tinan 2022 no 2023 mak faze dezenvolvimentu ou faze kresimentu," katak nia.

Kona-ba uma-kain hirak ne’ebé sei simu apoiu ne’e, Ministru Fidelis hatete, laiha limitasaun, katak uma-kain hotu-hotu iha TL sei simu.

"Objetivu kobertura ne'e ba sidadaun sira hotu ne'ebé mak hela iha Timor, hanesan apoiu ida uluk anterior ita apoiu osan ba familia ne'ebé ho salariu $500 dollar mai kraik, maibé agora apoiu sesta bazika ne'e ba uma-kain hotu-hotu."

Objetivu husi medidas ne’e, nia esplika, atu apoiu nesesidade bazika sidadaun sira nian, apoiu ba traballador iha seitor informal sira, no mantein ka asegura atu sidadaun sira labele lakon serbisu, empreza sira la taka no mantein partisipa nafatin iha merkadu.

"Preferensia iha medida ida ne'e mak inklui sasan sira ne'ebé mak ita produs iha rai laran, tanba ne'e detallu liu depois Ministériu implementador sira mak sei implementa, ne'ebe buat ohin hatudu ne'e, komisaun rekuperasaun ekonomika fó no governu aprova, depois Ministériu Kordenador Asuntu Ekonomia (MKAE) mak sei orienta implementasaun ba iha programa governu ninian," nia hatete.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.