Ministru Ensinu Superiór Siénsia no Kultura, Longuinhos dos Santos hateten governu desidi sei selu hikas bolseiru sira nia osan, tanba governu kumpre dekretu lei.
"Billete aviaun nian ba no mai, ne'e lei preve. Kuandu sira ba no bainhira remata hotu ona atu fila, iha Pandemia Covid-19 ida ne'e maka iha atrazu ruma, depois sira selu rasik billete hodi fila mai, governu liu husi Ministériu Ensinu Superiór sei fó fila sira nia osan", Longuinhos informa asuntu ne’e hafoin audiénsia públika OJE 2021 ho komisaun G iha PN, Kuarta (11/11).
Kona-ba bolseiru ne'ebé sei simu hikas sira nia osan, nia hateten, MESSK identifika iha na’in tolu ne'ebé foin to'o mai iha Timor, no tempu besik sei bolu sira atu fó fila sira nia osan.
"Osan ne'ebe fó ne'e tuir billete ne'ebé mak sira iha. Tanba ne'e Lei atribui atu fó kompeténsia ba MESSK bele fó hikas osan. Maibé, ida ne'e ba de’it estudante bolseiru no sira ne’ebé la'ós bolseiru, ne'e la’ós MESSK nia responsabilidade," Ministru ne’e hateten.
Nia hatutan, iha dekretu Lei governu nian hateten klaru katak, governu liu husi Ministériu Ensinu Superiór mak sei responsabiliza estudante bolseiru, maibé ba estudante sira seluk ne'ebé la’ós bolseiru ida ne'e Ministériu Negósiu Estranjeiru no Koperasaun ninia kompeténsia.
PUBLISIDADE
