Sekretáriu Estadu Asuntu Kombatentes Libertasaun Nasionál, Gil da Costa Monteiro 'Oan Soru' mak sei sai hanesan jestór ba osan ne’e, nune'e sei halo fiskalizasaun másima bainhira osan ne’e iha ona liman.

"Automatikamente osan ne'e, hau sai hanesan jestór, hakarak ou lakhoi fiskaliza atu hare katak, osan ne'e aloka ninia objetivu ne'e ba uma la'ós ba kualkér sasan”, Oan Soru hateten lia hirak ne’e ba jornalista sira hafoin hasoru-malu ho Primeiru Ministru (PM), Taur Matan Ruak iha palasiu governu, Kuarta (11/11).

Veteranu ne’e fó ezemplu katak, bainhira komadante ida fó kilat musan ida ba nia soldadu, tanba komandante ne’e hatene katak, soldadu ne'e kasador atu han na'an, maibé, to'o kartus hotu no na'an laiha, ne'e lei iha atu regularize.

Tanba ne’e, Oan Soru husu no apela ba veteranus sira ne'ebé sai benefisiariu ba orsamentu rihun $40, tenke kompriende situasaun no regra.

"Benefisiáriu ne'e oin metan ka mutin, ami koñese hotu kedas. Tanba ne’e la'os atu halo fali sosializasaun, tanba horbainhira konvoka hotu ona, mai tuir reuniaun iha salaun Katedral ne'e ami koñese hotu kedas, atu ba buka tuir fali ne'e laiha, liu husi telfone bolu sira de'it mai mós bele, tanba ladún barak no merese duni estadu iha devér morál atu asegura," Oan Soru esplika.

Nia subliña katak, osan ne’e tenke halo duni um aba veteranu hirak ne’e tanba, sira balun idade 50, foin hola feto no hahoris hela nia oan na'in 3 ou 4 aman mate tiha, entrega hela problema ida ba faluk no oan ki'ak sira, hanesan komadante Samba Sembilan.

"Ne'ebé situasaun ne'e bele rezolve, maibé rezolve ho regra, ida ne'ebé funu hotu ona mai mak husik hela susar ida ba faluk no oan ida, mai oan laran metin hela ba aman mas hakfodak oan ne'e sai oan ki'ak sedu, hanesan uluk funu, tan ne'e dever moral estadu nian atu rezolve," nia akresenta.

Tuir nia, fazeadamente ida pur ida sei hare hodi fó solusaun, maibé labele hanoin atu rezolve dala ida.

PUBLISIDADE