Ministru Transporte no Komunikasaun (MTK), José Agustinho da Silva hateten, terminal Bekora sei muda ba Hera, terminal Tasi tolu sei muda ba Tibar no terminal Halilaran sei muda ba Manleuana.
"Ohin hato'o ba Primeiru Ministru, kona-ba politika governu nian iha Ministériu Tranporte no Komunikasaun iha seitor transporte terestre nian.Primeiru konstrusaun terminal rezionál sira ne'ebé halo atendimentu ba populasaun Leste no sul", Ministru ne’e ko’alia ba jornalista hafoin hasoru-malu ho Primeiru Ministru Taur Matan Ruak iha palasiu governu, tersa (10/11).
Tuir nia, halo konstrusaun ba terminal dook oitoan husi Dili, nune'e bele loke espasu sidade luan, tanba fatin tasi tolu hanesan sitiu istoriku nasaun nian, ne’ebé loron boot sempre komemora, ho ida ne'e bele fó espasu ba Mikrolete no Taxi sira ne’ebé durante iha de'it Dili laran bele halo movimentasaun.
Ministru ne’e mós informa ba Primeiru Ministru ne’ebé ko'alia kona-ba parte Diresaun Nasionál Transporte Terestre (DNTT) oinsa regulariza movimentu kontentór sira ne'ebé halo movimentu iha loron.
"Kontentór sira ne'ebé halo movimentu loron, orsida bele rezulta engarafamentu asidente trafiku, oinsa atu regula durante sira hala'o atividade iha loron, mais agora halo oinsa mak labele autoriza sira la'o loron, no sira la'o iha kalan", nia esplika.
Nia dehan, atu implementa hirak ne'e, tenke hatun ho despaisu konjunta ida.
"Despaisu ida ne'e, Ministériu Transporte no Komunikasaun hato'o tiha ona draft ou esbosu despaisu ne'e ba Ministériu Interior, MTKI no finansas, maibe rezultadu ikus Ministériu rua mak sei asina", nia hateten tan.
Entretantu, Ministériu rua ne'ebé atu asina mak, Ministériu Transporte no Komunikasaun (MTK), Ministériu Interior (MI) atu halo regulamentu ba movimentu kontentór iha loron nune’e, hodi bele evita engarafamentu ho asidente.
