Tempotimor (Dili)- Sekretáriu Estadu Juventude no Desportu (SEJD) Abrão Saldanha konvida ona Prezidente Repúblika (PR) Francisco Guterres Lú Olo atu partisipa iha komemorasaun loron Masakre Santa Kruz ba dala 28 no Loron Nasionál Juventude Timor-Leste (LNJ-TL) ba dala 18, no konfirmadu katak, xefe estadu sei partisipa.
Abrão Saldanha hateten, PR sei partisipa no hato'o nia diskursu ba juventude iha ámbitu komemorasaun Masakre Santa Kruz no Loron Nasionál Juventude iha semitériu Santa Kruz.
"Ohin mai konvida ofisiál ba PR Lú Olo hodi hato'o nia diskuru iha momentu importante ba komemorasaun 12 Novembru," Abrão ko’alia asuntu ne’e hafoin audiénsia ho xefe estadu iha Palásiu Prezidensiál bairru-pite, Dili, Tersa (10/11).
Nia dehan, PR Konfirmadu atu partisipa iha komemorasaun ne'e, no apresia ba servisu juventude no nia mós rekoñese importánte duni atu foti tema ida kona-ba preparasaun no harii joven sira-nia reziliénsia hodi bele hasoru problmea sira ne'ebé akontese iha Timor-Leste.
Entretantu, tema kona-ba reziliénsia ne'e maka oinsa ema ida-idak iha kapasidade reziliente iha aspeitu ekonómiku, sosiál nune'e bele hasoru krize sira ne'ebé ameasa umanidade no ambiente.