Deputadu Asanami koalia ne'e tanba tuir nia hare katak, durante ne’e ró nakroman tula pasajeiru la tuir kapasidade ro nian, tanba baibain membru husi instituisun estadu rua, sa'e ró la uza billete, entaun ida ne'e bele difikulta kapasidade ró nian tanba tula ema barak liu.

"Sa'e ró nakroman tenke tuir kálkulu atu iha desizaun duni katak, polisia ho F-FDTL, karik sira sa'e ho gratuita, maibé sira tenke iha billet nafatin, atu bele ita soma hamutuk, ho totál pasajeiru ba kapasidade ró nian,"

Assanami hateten lia hirak ne’e liu husi audiénsia públika OJE 2021 ho prezidente autoridade RAEOA Arsénio Bano iha plenaria PN, Tersa (10/11).

Nia hatutan, volume ró nian presiza iha kuidadu boot, no hare sa'e tenke tuir estandar nune'e bele asegura ró labele faila durante hala'o viajen.

"tanba ita la imajina se ró ne'e kuandu iha problema, ne'e ita salva ho saida, ita laiha aviaun no ita laiha sasan ida ne'ebé atu ba salva,"nia preokupa.

Aleinde kapasidade Ró nakroman, nia husu mós prezidente RAEOA atu hare hadi’a kondisaun portu rua Oekusi ho Dili, nune'e fasil atu bele halibur pasajeiru molok sa'e ro.