“Ne'ebé ha'u hanoin ha'u fila ba, ha'u sei ko'alia ho señor Ministru Transporte no Komunikasaun atu haree fali se bele hasa'e tán frekuénsia, semana-ida la'ós dala-ida maibé pelu menus semana-ida dala-rua mai Oekussi”, dehan nia hodi hatan ba preokupasaun husi populasaun sira liuhusi atividade diálogu ne'ebé hala'o iha Suku Bobometo, Sub-rejiaun Oesilo, kuarta (20/07).
Maske ko'alia kona-ba transporte marítima ne'e mák Ró Berlin Ramelau ne'e, nia sempre hala'i hela, semana ida hala'i dala-ida, maibé espera no hein katak, iha futuru Governu sei tur hamutuk filafali hodi haree ninia prosesu oinsá mak bele fasilita di'ak liután komunidade sira nia viajen ba no mai.
Maske atividade transportasaun husi Oekussi ba Dili ne'e iha alternativa oioin, bele viajen liuhusi fronteira terestre entre Timor-Leste no Indonézia no bele mós ho aviaun maibé ida-ne'e nia kustu mak karun, nune'e Governu mós hanoin transportasaun marítima mak di'ak liu no baratu.
Maibé ba operasaun Ró Berlin Ramelau husi Oekussi ba Dili, biar nia halai semana ida dala-ida mós nia sei lori hotu pasajeiru sira no sei lá husik hela pasajeiru ida iha ponte kais. (*)