Tuir xefe suku Waimori Felicioano António Gomes ba www.tempotimor.com liuhusi via telefone katak, to'o agora populasaun iha suku waimori la sente dezenvolvimentu ukun-aan ida ne'e nian.
"Populasaun iha suku Waimori postu administrativu Vikeke, Munisípiu Vikeke ne'e, to'o agora ladun sente dezenvolvimentu iha nasaun ida ne'e, tanba estrada mós la'ós husi kapitál munisípiu Vikeke, maibé ami sesu fali husi munisípiu Baukau parte postu administrativu Venilale no Vemasse," dehan xefe suku ne'e ba TT liuhusi via telefone, Tersa (27/10).
Nia mós dehan, kona-ba liña eletrisidade to'o agora laiha, entaun komunidade sira sei uza de'it solar panel.
"Liña eletrisidade iha ne'e to'o agora laiha, kompañia sira mai sukat troka malu, maibé la halo ida, maske laiha problema, maibé informasaun ne'ebé ami hetan katak governu osan laiha depoia empase polítika," nia dehan.
Alende husi liña eletrisidade no estrada nian, iha mós bee moos ne'ebé komunidade barak seidauk asesu.
Iha fatin seluk, delegadu aldeia Lulei António Rangel dehan, solar panel ne'ebé populasaun waimori uza ne'e hetan apoiu husi governu iha tinan hira liubá inklui kompañia balun ne'ebé apoiu mós solar panel.
"Maibé uluk kuandu seidauk iha apoiu ne'e, povu ne'ebá uza de'it lampu tradisionál," nia dehan.
Lider komunitáriu ne'e mós subliña, "ema hotu iha Timor hatene katak Waimori ne'e suku ne'ebé istóriku, maibé dezenvolvimentu laiha," nia tenik.
Alende ne'e dalan ne'ebé ligasaun husi kapitál munisípiu Vikeke ba suku Waimori hamutuk kilometru 30, maibé se estrada ligasaun husi munisípiu Baukau parte postu administrativu Venilale nian entaun iha de'it kolometru hitu no totál populasaun iha suku Waimori hamutuk uma-uma-kain 514 no suku ne'e rasik iha aldeia neen, ne'ebé populasaun sira-nia maiória moris nu'udar agrikultór.(*)