Tuir informasaun www.tempotimor.com asesu iha pajina ofisiál BTL,E.P katak, Primeiru Ministru fó ona orientasaun ba ezekutivu BTL, E.P, atu kontinua servisu maka'as, hodi lori bee ba komunidade sira, liu-liu populasaun hirak, ne’ebé seidauk asesu bee.

Maske BTL, E.P hasoru difikuldades oi-oin, maibé Primeiru Ministru nafatin fó koragen ba funsionáriu sira, atu servisu ho dedikasaun tomak, nune’e bele lori bee ba komunidade sira iha territóriu nasionál.

Enkuantu Prezidente Konsellu Ezekutivu BTL, E.P, Carlos Peloi dos Reis, hatete, hahú iha tinan 2023 ba oin, sei kontinua nafatin ho indikadór tolu, ne’ebé governu inpoin ba BTL, E.P mak jere sistema bee iha territóriu tomak, hodi funsiona 24 horas.

"Tanba ne’e ami sei foku liu ba ida ne’e, reforsa nafatin servisu operasaun no manutensaun ba sistema, liu-liu iha kapitál no munisípiu sira, atu bele garante distribuisaun bee ba komunidade sira, iha Munisípiu nomós Díli. Alende ne’e, jere mos sistema saneamentu sira, ne’ebé mak iha, hodi halo tratamentu ba bee fo’er sira, nune’e labele husik bee fo’er direita ba ambiente", dehan nia

Kontinua promove mós projetu foun hanesan konstrusaun no melloramentu sistema bee moos iha kapitál postu administrativu sira, nune’e bele fasilita komunidade sira, hodi asesu bee ho di’ak.

Iha tinan 2022, konsege promove projetu foun sira, hamutuk 54, husi númeru ne’e, projetu 24 no suku tolu mak la’o hela (ongoing), sei iha kapitál postu administrativu 24 mak halo hela dezeñu detalladu, ne’ebé espera bele implementa iha tinan 2023.

Alende ba projetu iha postu administrativu no suku, BTL, E.P apoiu mós materiál kanu ba komunidade, liu-liu ba sistema sira ne’ebé ki’ik hodi halo instalasaun rasik, maibé akompaña husi tékniku sira.

Projetu boot hanesan melloramentu ba sistema bee moos iha kapitál Dili no Munisípiu sira ne’ebé iha tinan kotuk halo dezeñu detalladu mak iha Baukau, Manufahi, Lautém, Vikeke no Díli, no dadaun iha hela prosesu ba verifikasaun husi ADN.

"Tanba ne’e fiar katak, ADN servisu maka’as ba DED, hodi bele lansa projetu melloramentu ba sistema bee moos iha tinan ne’e", nia informa

Enkuantu ba Munisípiu sira seluk iha tinan kotuk finaliza planu ne’ebé konklui ona pursentu-100, iha tinan ne’e ba faze dezeñu detalladu finaliza iha tinan ne’e, tinan oin bele lansa mos projetu melloramentu sistema bee moos.

Tinan 2023 mos sei fokus liu ba DED sistema saneamentu iha sidade Díli, ne’ebé iha tinan kotuk asina akordu entre Governu Timor-Leste ho MCC, atu hadi’a sistema saneamentu nomós estasaun tratamentu bee foer iha Kapitál Díli. (*)