Prezidente Konsellu Administrasaun EDTL, E.P, Paulo da Silva hatete, reseita hirak ne’e, mai husi monta kontador.

"Tinan kotuk ita rekolla reseita 40 miloens ho ezersisiu ne'ebé monta kontador no mós halo inspesaun rutina konsege ultrapasa prosesaun 48.36 miloens, maibé sira nia tarjetu ne'e 40 milloens de'it, hanesan progresu ida ba ita nia esforsu, parte seluk mak konsege instala sistema FMS ba empreza", dehan nia hafoin sorumutu ho Primeiru Ministru, Taur Matan Ruak iha palasiu governu, sesta (20/01).

Tanba, EDTL uza sistema FMS atu halo jestaun ba finansiamentu, acet sira servisu administrasaun ninian.

"Ita konklui ona estudu rua hanesan estudu konversaun dijel ba gás, ida seluk mak solár panel ka tenaga suria ne'e mós ita konklui tiha ona", nia esplika.

Agora EDTL prepara hela dokumentu ba prosesu tenderizasaun sei halo tradusaun ba lian estranjeiru tuir lei aprovizonamentu haruka atu aselera uluk solár painel.

"Ita nia espetativa iha fim fulan ida ne'e ka inisiu fulan-fevereiru ita lansa ona prosesu tenderizasaun internasionál atu harii planta solár TV iha Manatutu minimu 72 to'o 80 Mgwot ida", nia dehan.

Alende ne’e, relata mós ba Primeiru Ministru kona-ba populasaun iha Timor-Leste ne’ebé asesu ba liña eletrisidade atinji ona pursentu hamutuk 91.

"Kuandu husi diresaun jerál transfere mai EDTL, E.P ne'e 59 Sukus agora dadaun iha nivel pursentu 85% agora sa'e ona ba 91% mak asesu ona, no hela 9%, maibé konstrusaun la'o namas hela, nune’e ita nia espetativa fulan haat ba oin bele konklui ona ", nia afirma.

Parte sira ne'ebé sei iha faze konstrusaun mak hanesan, Munisípiu Ermera, Manufahi, Aileu, Manatutu, Bobonaru no Ataúru.

Progresu ne'ebé atinji iha tinan 2022, hasae rasio eletrikasaun ba suku sira ne'ebé uluk asesu mak pursentu 85, maibé to'o iha fulan-dezembru sa'e ona ba pursentu 91, nune’e hela de'it suku 401 mak sei iha faze konstrusaun nia laran, espera ba oin komunidade sira bele asesu hotu ona eletrisidade. (*)