Timor-Leste asumi kompromisu atu hadi’a kondisaun moris populasaun sira nian, liu-liu ba nia moris-di’ak iha área edukasaun, saúde no hahán no asesu ba servisu no infraestrutura bázika, hodi kontribui ba dezenvolvimentu no estabilidade ekonómika país nian.
"Kompromisu ida ne’e, fó brani ba ita-nia aposta estratéjika atu kombate ki’ak no sub-nutrisaun infantil no familiar, ne’ebé justifika ita-nia adezaun ba Movimento Globál, atu hadi’a nutrisaun, koñesidu iha Lian Inglés hanesan SUN Movement ka Scaling Up Nutrition Movement", Komunikadu ne'ebé tempotimor.com asesu iha loron, tersa (13/10).
Ho hanoin ida ne’e, mak ita hakarak mobiliza rekursus umanus no finanseirus, hodi harii Parserias Públikas no Privadas foun, atu implementa Roteiru Operasionál, husi Movimentu SUN iha Timor-Leste, atu apoia planu no polítika nutrisaun nasionál.
"Ita fiar katak, ho apoiu Movimentu SUN iha Timor-Leste, ita sei iha posibilidade atu fó ba labarik sira komesa moris ida di’ak liu, hodi kontribui atu reduz índise sub-nutrisaun, mortalidade infantil no asegura dezenvolvimentu sosiedade ida saudavel no ativa ho labarik sira ne’ebé han di’ak, família prospera no populasaun forte", Dehan PM Taur, iha komunikadu ne'e
Ikus liu, Xefe Governu Taur Matan Ruak, hato'o agradesimentu espesiál, ba Sua Exelénsia Asistente Sekretáriu-Jerál Nasõens Unidas nian, nu'udár Koordenadór husi Movimentu SUN, Señora Gerda Verburg, ba apoia hotu ne’ebé fó tiha ona no ba konfiansa ne’ebé membru sira husi Movimentu Globál depozita mai Timor-Leste. (*)