Ba komemorasaun ne'e, Diretór Jerál Diresaun Nasionál Risku Dezastre (DNRD), Superintendente Xefe Polísia, Ismael da Costa Babo, husu ba sidadaun tomak atu partsipa hodi fó kontribuisaun liuhosi proteje ambiente inklui proteje mós animál fuik sira ne'ebé eziste, iha ai-laran.
"Protesaun sivil husu ba sidadaun sira nia partisipasaun, liu-liu atu partisipa hodi proteje ita-nia ambiente no mós proteje ita-nia animal fuik sira i sira mós sai hanesan ponte, ne'ebé mensajen ne'ebé protesaun sívil fó, sira sei tranzmite ba sira nia família", hatete Ismael da Costa Babo ba jornalísta sira, iha Sala Leitura Xanana Gusmăo (Xanana Reading Room), hafoin partisipa iha semináriu ho tema "Polítika Governu nian Hodi Responde ba Risku Dezastre iha TL", tersa (13/10).
Ismael hatete, ajente Protesaun Sivil ne'e la'os Protesaun Sivil mesak de'it, maibé komponente hotu-hotu, sidadaun normál, setór privadu, Governu, sosiedade sivíl, média sira hotu, komponente hotu-hotu, sai hanesan parte ida husi protesaun sívil, tanbá nee, bainhira akontese dezastre ruma, la'ós ema ida de'it mak responsabiliza, maibé responsabilidade ema hotu nian.
"Tanbá iha komponente tolu mak importante, hodi apoiu ba prevensaun dezastres naturais, bazeia ba nia giaun ida mak prevensaun, apoiu emerjénsia kuandu dezastre, depois rekuperasaun ba fali vida normál", dehan nia.
Nia hatutan, husi pontu tolu ne'e, iha mós komponente importante tolu, atu bele apoiu, ida mak individual support ka suporta individuál, katak individu ida-idak nia kontribuisaun ba dezastre, ba nia-aan rasik, ba nia família nomós nia sasán ne'ebé mak iha.
Alende ne'e, public support la suporta públiku, mak husi instituisaun Estadu, Governu sira ne'ebé mak fó asisténsia, nomós bele dehan katak, humanitarian support la suporta umanitária, husi organizasaun internasionál sira nia tulun, ba papél dezastre nian.
"Ida ne'e mak papél ne'ebé mak atu informa ba sira, i sé mak koordena ida ne'e, protesaun sivil mak koordena asuntu sira ne'e", esplika nia.
Entretantu, semináriu loron sorin ne'e rasik, organiza husi Sala Leitura Xanana Gusmão (Xanana Reading Room), hodi komemora loron mundial risku dezastre liu-liu iha Timor-Leste.