Odete hatete, Ministériu Saúde haree liu ba pasajeiru sira ne'ebé tama mai husi fronteira ho dalan legal, maibé ida tama ilegal parte seguransa Unidade Patrollamentu Fronteira (UPF) dalaruma la konsege kontrola, tanba joven sira tama ilegal númeru boot tebes.
"Ministériu saúde haree liu-ba pasageiru sira ne'ebé tama legal fo kondisoes, liu-liu ba pasageiru sira mai servisu, tanba ita lakohi servisu ka dezenvolvimentu para, entaun husi Konsellu ami desidi hamutuk ema ne'ebé hakarak fila mai halo fila Liman no halo servisu konstrusaun sira ne'e, ita fo autorizasaun par tama i ita kontrola", informa MS Odete hafoin remata reuniaun Konsellu fundu Covid-19 iha edifísiu Ministériu Finansas Aitarak-Laran, kinta (10/09).
Governante ne'e hatutan, parte seguransa la konsege kontrola mak, joven sira ne'ebé ba hala'o aktividade ilegalmente iha Kupang Indonesia.
"Parte balun ne'ebé ita lakon kontrola mak, maluk sira ne'ebé liu-liu ba ema estranjeiru Indonesia ne'ebé tenta liu duni husi dalan la'os fronteira, hanesan dalan ilegal, ida ne'e mak tristeza boot ba ita, tanba kontrola mos la hetan",dehan MS
Nia esplika, Iha fulan hat no lima liu-ba, sei bele kontrola no kaer balun, maibé iha semana ida ka rua liu-ba labele kontrola, tanba númeru ne'ebé tama barak liu, tanba liga ho alin sira ne'ebé ba halo atividade joven ka ema klosan nian kona-ba sae sabuk.
"Joven iha direitu atu halo aktividade ne'e, hau la ko'alia, maibé ita nia hakarak tenke liu-husi dalan ida par bele kontrola. Grupu ida ne'e mak boot tebes tama ilegal entaun labele kontrola, ita nia UPF barak mais susar ituan, tanba sira tama ilegal ho grupu ki'ik, dalaruma mos sira hatene UPF nia servisu entaun aproveita situasaun ne'e tama mai",Nia dehan
Tuir Nia, joven hirak ne'ebé tama mai ilegal, la'os kaptura iha fronteira ho Dili de'it, maibé balun parte seguransa ba kaptura iha Munisípiu.
"Ita reza par virus ne'e la iha sira nia isin, se virus ne'e kontaminadu iha sira nia isin, ita hanoin tebes komunidade",tenik MS
Maske nune'e, maibé parte governu nafatin halo esforsu hotu-hotu atu antisipa hodi halo prevensaun ba moras Covid-19.
Antes ne'e, Operasaun konjuntu entre Unidade Polisia Fronteira (UPF), Komandu Operasaun Espesiál (KOE), ho Falintil Forsa Defeza Timor-Leste (F-FDTL) konsege kaptura membru Artemarsiál husi organizasaun PSHT na'in 37 iha fronteira Batugade no na'in 14 iha Dili, Colmera.
Portavóz Komando Jerál PNTL, Superintendente Arnaldo Araújo relata, membru PSHT nain 37 ne'e sira kaptura hafoin ba hala'o ezame sa'e sintu iha Atambua Indonézia.
"Membru arte marsial sira ne'e hamutuk ema nain 37 mak ami kaptura no agora detein iha kuarentena Batugade informa Arnaldo liu husi konferensia imprensa iha kuartel jerál PNTL, Kaikoli, Kuarta (09/09.
