Iha Kuarta (09/09) PNTL konsege kaptura membru PSHT na’in 14 iha area Kolmera ne’ebé konsege ultrapasa fronteira ho illegal hafoin hela iha Atambua durante fulan ida hodi hasa’e sintu.

La’os de’it sira na’in 14, iha inisiu fulan ne’e, parte seguransa iha fronteira konsege kaptura mós membru PSHT lubuk ida ne’ebé tenta tama fali mai Timor-Leste liu husi dalan illegal. Sira ba hasa’e sintu iha Atambua.

Ho ulun toos ne’ebé Timor-oan sira hatudu, Prezidente Repúblika Francisco Guterres Lú Olo husu ba governu atu haforsa regras iha fronteira.

"Ohin PR diskute ho governu kona-ba fronteira, liu-liu tama-sai ilegál ne'ebé relasaun ho Covid-19, tanba ne'e mak PR ho governu diskute par prevene tama-sai ilegál ne'e par labele (iha) transmisaun lokál ba ita-nia sosiedade," dehan Xefe Kaza Sivil Francisco Maria de Vasconcelos iha Palásiu Prezidensiál, Kinta (10/9).

Nia dehan, PR Lú Olo no governu preokupa, tanba ema ne'ebé liu dalan ilegál bele lori moras mai TL.

"Tanba sira ne'ebé liu husi dalan ilegál ne'e bele lori (Covid-19) iha sira-nia isin, tanba ne'e mak prezidente preokupa ho situasaun ne'e, entaun konvida governu sira mai par diskute hodi tau atensaun," katak nia.

Iha sorumutu ho governu, PR Lú Olo husu atu governu esforu hodi haforsa medidas iha fronteira hodi evita ema tama-sai illegal.

"Governu tenke asegura, tau matan ba ita-nia fronteira ne'ebá, atu nune'e ema ne'ebé tama sai, sira tenke buka tuir hodi tau iha karantina, para iha moras karaik labele iha transmite lokál ba komunidade sira," nia tenik.

Entretantu, sorumutu ne’e partisipa husi Primeiru Ministru Taur Matan Ruak, Vise Primeiru Ministru no Ministru Planu Ordenamentu Teritoriál José Reis, Ministru Defeza Filomeno Paixão de Jesus no Ministra Negósiu Estranjéiru no Kooperasaun Adalzija Magno.