“Ha’u husu katak, posibilidade Papa atu vizita ba Timor, maibé Papa esplika katak, nia husu deskulpa, la’e tinan kotuk nia ba tiha ona Timor-Leste, maibé tanba moras COVID-19 mosu, mak nia la konsege ba”, dehan Xanana liuhusi komunikadu Imprensa ne'ebé www.tempotimor.com asesu husi Gabinete Prezidente Repúblika, sábadu (27/08).

Maske la konsege vizita Timor-Leste maibé iha enkontru ho Papa Francisco ko’alia ho hamanasa oituan, no nia dehan sei haree tok tinan sira mai ne’e karik bele ba vizita.

Purtantu nu’udar Reprezentante Enviadu espesiál Prezidente Repúblika nian konvida nafatin Amu Papa hodi povu Katólika Timor-Leste nia naran atu Amu Papa bele halo vizita ba Timor.

Nune'e haktuir mós katak, oras ne'e daudaun Timor-Leste nian Reprezentasaun Vatikanu iha Dili sei hala’o servisu husi Nunsiatura Malázia reprezentante iha Dili hanesan de’it enkaregadu ba negósia husi reprezentasaun Malázia mai Timor-Leste.

Entaun ho hanoin ida-ne’e, Amu Papa hatan no dehan, sei estabelese uluk nia reprezentasaun, hodi prienxe kritéria atu sai reprezentante permanente, nomós sei edifísiu ba funsionamentu servisu Reprezentasaun Santa Sé nian iha Estadu ne’ebè.

Ho razaun hirak ne’e Amu Papa nia Vise Primeiru Ministru husi Vatikanu sei ba vizita ba Timor-Leste atu haree besik liu kondisaun hodi prepara atu sai nu’udar nunsiatura ketak. Iha oportunidade ida-ne’e, Reprezentante Amu Papa nian sei halo mós inagurasaun ba edifísiu nunsiatura foun iha Dili.

Xanana husu ba povu tomak atu hasa’e orasaun ba Na’i Maromak bele haraik nafatin bensaun no grasa ba Papa Fransisco nia kondisaun saúde ne’ebé tama ona idade 85. (*)