Liga ba reuniaun KE nian ne'e, xefe kaza sivíl Francisco Maria de Vasconcelhos katak, KE apoiu tomak, tanba ne'e husu ona PR atu husu autorizasaun PN nian.
"Konsellu Estadu (KE) ohin deskute ona proposta husi governu kona-ba estadu emerjénsia dalima nian no KE rekomenda ba PR para haruka ba PN hodi diskute, atu nune'e bele lori fali mai para PR dekreta EE tuir mai," dehan xefe kaza sivíl Francisco ba jornalista sira iha Palásiu Prezidensiál bairru-pite, Segunda (31/08).
Nia mós dehan, EE kontinua tanba haree ba númeru Covid-19 nian iha nasaun viziñu Indonézia.
"Ita haree ba ita-nia viziñu Indonézia ne'ebé kada vez númeru aumenta, entaun EE tuir mai ne'e nia foku nafatin hanesan foin dadaun liu ba, hanesan ba aeroportu, portu nomós fronteira rai," nia afirma.
Maske antes ne'e PR deklara katak lakohi tan iha EE dalima, maibé xefe kaza sivíl dehan, PR kontinua simu pedidu husi governu tanba seidauk iha lei própriu hodi substitui ba EE.
Iha parte seluk, Diretór Ezekutivu Fongtil Daniel Santos do Carmo katak, EE agora ne'e foku nafatin ba fronteira sira.
"EE dalima ne'e atu reforsa liután kontrolu iha fronteira rai tanba ema kontinua tama ho ilegalmente iha ita-nia rai, alende ne'e sei kontrola mós ba parte aeroportu, portu no marítima, para fó biban ba governu hodi halo kontrolu di'ak liután, para labele iha propagasaun ba transmisaun kazu lokál nian," dehan Daniel