"Di'ak liu prevene duke ikus mai basa rentos, tanba haree ba limitasaun ne'ebé iha hanesan ekipamentu depois ita mós menus iha tékniku Covid-19, tanba ita haree iha nasaun seluk mate barak tanba ne'e ita kumpre de'it saida mak estadu halo," dehan Ana ba www.tempotimor.com iha nia knaar fatin JSMP Kolmera Dili,Tersa (01/9).
Estadu Emerjénsia ba dala V rasik haree liu iha parte fronteira, nune'e importante mak oinsá atu tau atensaun rekursu ba parte seguransa iha fronteira no fatin kuarentena, nune'e governu fasil atu kontrola.
"Di'ak liu prevene kedas duke kura, tanba ita iha limitasaun ba rekursu umanu no ekipamentu. Estadu Emerjénsia ne'ebé nia exesaun iha área fronteira ne'e loloos fasil ba governu atu kontrola, prevene no fó de'it rekursu ba seguransa sira iha fronteira no kuarentena," dehan Ana.
Nia hatutan, mekanizmu prevensaun Covid-19 hanesan taka fronteira no loke de'it iha lorin ne'ebé determinadu ona, importante mak iha rai-laran presiza nafatin kumpre regra sira hanesan uza máskara, kria nafatin distánsia sosiál inklui fase liman beibeik.
Entretantu, Prezidente Repúblika, Francisco Guterres Lu Olo, diretamente prezide reuniaun Konsellu Defeza no Seguransa no Konsellu Estadu ne'ebé aprova ona, nune'e sei hein autorizasaun husi Parlamentu Nasionál antes dekreta. (*)
