Embaixadór Australia iha Timor-Leste, Petter Robert hatete, Australia nafatin iha komitmentu atu apoiu Timor-Leste hodi haruka traballadór sira ba serbisu iha Australia.

"Australia iha komitmentu atu kontinua programa ne’e, no iha futuru harak haburas tan, tanba programa ida ne’e di’ak ba nasaun rua," dehan Petter hafoin sorumutu ho SEFOPE iha Kaikoli, Kuarta (22/07).

Nia hatutan, programa ida ne’e di’ak tebes ba Timor-oan sira, tanba bainhira sir aba serbisu iha Australia, sira bele aprende esperensia foun no hetan mós rendimentu.

Kada tinan, Petter dehan governu Australia presiza trabaladór Timor-oan na’in 1.200, maibé ba tinan ida ne’e, sira presiza tan na’in 600.

"Kada tinan maizumenus 1.200, maibé kada tinan hakarak haboot, i kontinua aumenta, tanba oportunidade di’ak ba joven Timor-oan sira.”

Tuir Embaixadór ne’e, durante ne’e traballadór Timor-oan sira hatudu prestasaun serbisu ne’ebé di’ak, tanba ne’e toos-nain sira iha Australia presiza tebes Timor-oan sira atu ba serbisu.

Iha fatin hanesan, Sekretáriu Estadu Formasaun Profesionál no Empregu (SEFOPE) Alarico Cardoso hatete, governu Australia prontu nafatin apoiu TL, no sira husu tan atu Timor-oan sira bele kontinua ba serbisu iha Australia.

"Sira husu 600 pessoas atu haruka ba hodi kuu has,” dehan Alarico.

Maibé, nia hatutan, relasiona ho pandemia Covid-19, bainhira haruka trabaladór sira ba, sira tenke tama kuarentena durante loron 14, no kustu ba akomodasaun kada ema ho valor $2,500.

“Ema ida tenke selu $2,500 dollares, entaun ita tenke iha osan. Tanba ne’e mak sei esforsu buka dalan oinsá mak atu ba.”

"Ohin ha’u husu tulun ba Embaxadór Australia bele hakaman uitoan, tanba $2,500 ne’e atu buka dalan oinsá? Tanba ne’e mak Embaixadór dehan katak iha futuru nia sei ba koko ko’alia, buka dalan, depois ita sei koalia hamutuk," informa Sekretariu Estadu ne’e.