Reitor UNTL Francisco Minguel Martins informa, divida ne'ebé UNTL iha ba eletrisidade no rede telekomunikasaun ne'ebé kompaña Telkomsel oferese hodi apoiu serbisu iha UNTL.
Maske divida ne'e mosu iha ninia mandatu, hahu husi 2016, maibé nia konsidera ida ne'e kulpa husi Ministeriu Edukusaun.
Tanba, tuir nia, momentu ne'eba la'os UNTL mak jere osan kona-ba nesesidade ida ne'e maibé Ministeriu Edukusaun mak jere.
"Kuandu EDTL sira mai deskobre katak UNTL seidauk selu eletrisidade entaun ami konsidera katak ida ne'e hanesan divida ida maibé ne'e la'os UNTL nia kulpa tanba momentu ne'eba la'os UNTL mak kaer osan, Ministeriu Edukusaun mak kaer osan no la selu," dehan Reitor UNTL ne'e ba www.tempotimor.com iha PN, Kuarta (22/07).
Atu solusiona kazu ne'e, nia hatete, dadaun husi sira aprezenta ona proposta hodi husu osan audisional ba Parlamentu Nasional atu bele konsidera iha OJE 2020, nune'e bele selu divida ida ne'e.
Entertantu, iha 2016, atual Sekretariu Jeral Partidu Demokratiku, Antonio da Conceição mak asume kargu nu'udar Ministru Edukasaun, no atual Ministra Edukasaun, Juventude no Desportu, Dulce Jesus Soares mak asume kargu nu'udar Vise Ministra Edukasaun.