“La hakat liu de’it, para iha-ne’e (Darwin) halibur timoroan sira iha ne’e, Timoroan-Xina, Timoroan-Portugéz, mistura barak. Ne’e mak rikusoin Timór nian”, dehan PR Horta, liuhusi Komunikadu Imprensa ne'ebé fó sai husi Gabinete Prezidente Repúblika, tersa (06/09).

Durante vizita, Xefe Estadu husu ba timoroan sira, atu habelar lian ofisiál Portuguéz no Tetun, tuir konstituisaun RDTL artigu 13, hodi rekoñese mós Inglés no Indonézia hanesan lian ba serbisu.

Nune'e Xefe Estadu mós garante katak, vizita Estadu ne’ebé halo ba komunidade timoroan sira, sei hametin liután relasaun entre Timor-Leste no Austrália no explora liután, kooperasaun iha dezenvolvimentu ekonómiku, defeza no seguransa, edukasaun, mobilidade laborál no inisiativa rejionál.

Tanba Vizita Estadu nian ba Austrália ne'e bazeia ba konvite ne'ebé hato'o husi Governadór Jerál Austrália, Han David Hurley no hasoru malu ho entidade oioin iha Darwin, Camberra no Sydney.

Reprezentante komunidade timoroan iha Darwin, Henrique Yap hatete, sira-nia parte hakarak fila mai Timor, hodi halo negósiu no bele mós halo interasaun no ajuda malu.

“Ami hakarak filafali ba Timór para halo business (negósiu). Ita bele halo interasaun, ita bele ajuda malu. Timoroan mós mai serbisu iha Austrália barak. Kuandu ita iha interrasaun barak hanesan ne’e, Timór sei iha futuru ida di’ak”, esplika Henrique. (*)