Lere Fuan Kanek, Konsidera Governu Abandona Veteranu Sira

Maijor Jeneral Lere Anan Timur hamutuk ho Xefe Kaza Militar PR, Mau Kalo hasoru malu ho Prezidente da Republika, Francisco Guterres Lu Olo iha palasiu Prezidensia Dili (22/7) Maijor Jeneral Lere Anan Timur hamutuk ho Xefe Kaza Militar PR, Mau Kalo hasoru malu ho Prezidente da Republika, Francisco Guterres Lu Olo iha palasiu Prezidensia Dili (22/7) Foto Midia PR

Tempotimor (Dili)-Xefe Estadu Maior FALINTIL Forsa Defeza Timor-Leste (F-FDTL) Maijor Jeneral Lere Anan Timur sente fuan kanek tanba konsidera governu abandona veteranu sira ne’ebé reforma ona husi vida militar.

Lere hatete, daudauk ne’e veteranu balun ne’ebé luta durante tinan 24 nia laran no reforma ona husi vida militar, balun koa tua, hakiak manu no fahi, no balun ema tarata no mós ameasa.

"Sira balun agora koa tua, hakiak manu, fahi, balun ninia maluk populasaun amesa, tolok, buat sira ne'e hotu. Balun agora moras, la'o la di'ak. Ezemplu, ha’u-nia alin Mau-Mesak, horseik nia oan feto mate tan, nia la'o la di'ak, toba de'it iha ne'ebá. Situasaun sira ne'e provoka emosaun ba ema ida, maibé se ha'u mak la kontrola an, ha'u dala-ruma ko'alia liu ida ne'e, mais pasiénsia."

“Se ha'u-nia sentimentu ba ha'u-nia alin veteranu sira, ha'u-nia fuan kanek, ha'u la kontente, la'ós ha'u de'it, maibé ninia maluk veteranu hotu, kuandu haree sira-nia situasaun, la kontente, liu-liu ofisiais sira ne'ebé iha forsa armada, sira la kontente, ne'e mak ami dehan katak, dezgostu ami-nian ba situasaun atual ne'e," dehan Lere hafoin hasoru Prezidente Repúblika Francisco Guteres Lu Olo iha Palasiu Prezidensial, Bairo-pite, Kuarta (22/07).

Tuir Lere, governu kria elite ida ne’ebé riku no sira ne’ebé kiak, nafatin kiak.

“Ne'e labele, ami ne'ebé uluk terus ba rai ida ne'e, posa moris hanesan ne'e, ha'u ne'e sei Jenerál, balun sira iha kargu Koronel ne'e mak sei istika aan, mais kuandu ami ba vida sivíl, ne'e dala-ruma ema tolok tan ami," nia hatete.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.