Tanba ne’e, SEFOPE realiza seremónia asina deklarasaun ho família traballadór na’in-74, iha loron tersa (08/03) atu husik oan, la’en ba servisu iha nasaun Austrália.

“Objetivu husi eventu ohin ne'e, mak atu oinsá parte husi Governu no família hodi assina deklarasaun atu sai hanesan komitmentu ida katak inan aman no família prontu ona husik sira-nia oan, la’en husi sira-nia le'et atu ba servisu iha ema nia rain. La'ós Governu mak obriga maibé Governu kria kondisaun de'it, oprotunidade ne'e traballadór sira mak aproveita”, dehan Diretór Nasionál Diresaun Nasionál Empregu Exterior, Filomeno Soares, iha Salaun DNEE, Bekora, tersa (08/03).

Maibé atu aproveita oportunidade sira ne'e, traballadór sira tenke kumpri rekezitu balun hodi asegura sira, bainhira servisu iha Aústralia. Tanba prosesu haruka traballu sira ba servisu iha rai liur la'ós prosesu fasil, maibé liuhusi prosesu ne'ebé naruk.

Ho ida ne’e, husu ba traballadór ne'ebé hetan ona oportunidade atu aproveita ho didi’ak hodi bele loke dalan ba joven sira iha fututu.

Traballadór sira ne’ebé atu aranka ba Aústralia ho totál ema na’in-74, iha feto na'in-28 no mane na'in-46, sei destaka iha Kompaña ADCO, Hilwood, Touis, Kuala Farm no Grace-co.

Família Traballadór, Helena da Costa hatete, husi parte família nian sente orgullu tanba sira-nia oan hetan oportunidade ba servisu iha Austrália hodi hadi’a moris família nian.

“Servisu ne'ebé sira hala'o iha Aústralia ne'e ita bele dehan katak todan no hanesan inan aman ka família presiza halo orasaun no kria unidade ne'ebé solidu iha uma laran. Nune'e bele motiva nia hodi hala'o servisu iha ema nia rai”, hatete nia.

Mensajen hanesan inan ba sira ba Traballadór sira tenke kuidadu-an liliu saúde nomós kuidadu fiziku sira-nia, tanba ambiente iha ema nia la hanesan Timor-Leste.

“Ida seluk sira labele servisu ilegál iha ema nia rai tanba família iha Timor presiza sira no servisu ba Governu para bainhira iha problema ruma Governu atende lalais”, hameno nia ba Traballadór. (*)