Tuir komunikadu imprensa ne'ebé fó sai husi media gabinete PM Taur katak, iha Sesta semana kotuk, PM Taur hetan xamada telefonika husi nia ómologu australianu, Scott Morrison, ne’ebé reitera Austrália nia apoiu no solidariedade ba Timor-Leste iha luta kontra surtu Covid-19.

“Iha konversa telefonika durante menutu 12 ne’e, Xefe Governu país viziñu rua ne’e mós aprofunda liu tán relasaun no kooperasaun país rua nian ba oin. Iha ne’ebé Austrália prontu ajuda Timor-Leste ho ekipamentu medikamentu balun tan no tékniku iha laboratóriu.”

PM Taur, agradese ba apoiu no solidariedade husi Governu no povu australianu embora iha Austrália mós hasoru problema Covid-19.

Entretantu, komunikadu ne'e hatutan, iha konversa refere, PM Taur mós aproveita hodi husu deskulpa tanba labele vizita nasaun kangaru ne'e.

“Xefe Governu timoroan husu deskulpa ba nia ómologu australianu tanba labele vizita Austrália iha fulan Abril hanesan promete ona,” deklara komunikadu ne'ebé www.tempotimor.com asesu, Segunda (27/04).