Prezidente Bankada FRETILIN iha Parlamentu Nasionál, Aniceto Guterres hatete, tempu ona partidu politiku sira hatama interese polítika no grupu nian iha kuarentena hodi apoiu governu ba kombate surtu Covid-19.
"FRETILIN hakarak apelu ba forsa politiku hotu katak, iha momentu ida ne'e mak atu hatama iha kuarentena interese polítika no grupu nian," dehan Aniceto iha plenária PN, bainhira hala'o debate ba extensaun estadu emerjénsia, Segunda (27/04)
Iha oportunidade ne'e, Aniceto dehan, bankada FRETILIN louva ideia sira ne'ebé atu halibur lider nasionál sira hodi funu kontra surtu Covid-19.
"Ami (fó) apresiasaun no louva inisiativa sira ne'ebé hakarak atu lori ita-nia lider sira, hamriik hamutuk hodi luta kontra surtu corona virus deasses 2019 ne'e ho nia konsekuénsia sira hotu, ekonomia no sosiál," dehan Aniceto.
Tuir nia, tempu ona atu lider sira hamutuk hodi buka dalan apoiu ba governu atu ultrapasa situasaun ne'ebé TL hasoru daudauk ne'e.
"Lider sira presiza hamutuk hodi fó hanoin no konseitu di'ak ba governu ho nia ekipa atu atua di'ak liu tán, maibé labele sai fali forsa paralelu hodi hasoru governu. Husik governu funsiona ho kapasidade ho ita hotu nia apoiu."